Երեք մլն ԱՄՆ դոլար է հատկացվել ՀՀ-ում առաջին վենչուրային հիմնադրամի ստեղծման համար

ՀՀ վարչապետ Տիգրան Սարգսյանի բարձր հովանու ներքո Երեւանի մաթեմատիկական մեքենաների գիտահետազոտական ինստիտուտում այսօր մեկնարկել է «ԱրմԹեք 2013» Հայաստանի բարձր տեխնոլոգիաների 6-րդ ամենամյա համաժողովը: Ողջունելով ներկաներին` վարչապետը նշել է, որ «ԱրմԹեք»-ը լավ հնարավորություն է` արձանագրելու ոլորտի նվաճումները եւ քննարկելու մարտահրավերները: «Մասնավոր հատվածի առաջնային հարցադրումը կրթական համակարգի շարունակական բարելավումն է եւ բարձրորակ մասնագետներով ՏՏ ոլորտի ապահովումը: Հաշվի առնելով, որ ոլորտում տարեկան աճը 15-20 տոկոս է, եւ այս պահին ունենք 7000 մասնագետ` 300 ձեռնարկությունում, հասկանալի է, որ միջնաժամկետ թիրախը լինելու է տարեկան 2000 որակյալ մասնագետի պատրաստում», - նշել է Տիգրան Սարգսյանը եւ բարձր գնահատել միջազգային հեղինակավոր կազմակերպությունների հետ համագործակցությունը, որի շրջանակում տեխնիկական եւ ֆինանսական օժանդակություն է տրամադրվում կադրերի պատրաստման եւ վերապատրաստման նպատակով: Վարչապետը, մասնավորապես, կարեւորել է «Մայքրոսոֆթ»-ի գրասենյակի, այդ թվում` Հայաստանի պետական ճարտարագիտական համալսարանի բազայի վրա ստեղծված կենտրոնի աշխատանքները, IBM ընկերության նախաձեռնությունը եւ այլն: Կառավարության ղեկավարն ընդգծել է, որ Հայաստանը թեւակոխում է ՏՏ ոլորտի զարգացման նոր փուլ, եւ անհրաժեշտ է հստակ ձեւակերպել հետագա անելիքները` 10 տարում ձեռք բերված հաջողությունը պահպանելու եւ ոլորտի շարունակական զարգացումն ապահովելու համար: Վարչապետի խոսքով` պետք է խթանել նմանատիպ մասնագիտացման եւ հարակից ոլորտների զարգացումը` միջազգային լավագույն չափանիշներին համադրելի ձեռքբերումներ ունենալու համար: Վարչապետը տեղեկացրել է, որ ՀՀ կառավարությունը Համաշխարհային բանկի հետ միասին շուրջ 3 մլն ԱՄՆ դոլար է հատկացրել ՀՀ-ում առաջին վենչուրային հիմնադրամի ստեղծման նպատակով: Տիգրան Սարգսյանի խոսքով` «ԱրմԹեք 2013»-ը հնարավորություն կտա բացահայտել ՏՏ զարգացման երկրորդ փուլի հիմնախնդիրները եւ հստակեցնել կառավարության անելիքները:

«ԱրմԹեք 2013» համաժողովին մասնակցում է Հայաստանի, ԱՄՆ-ի, Ռուսաստանի, Եվրոպայի, Միջին Արեւելքի, Հյուսիսային Աֆրիկայի եւ այլ տարածաշրջանների պետական մարմինների, գիտական եւ կրթական հաստատությունների, մասնավոր հատվածի, ինչպես նաեւ խոշորագույն անդրազգային կազմակերպությունների ավելի քան 200 ներկայացուցիչ: Համաժողովի նպատակն է աջակցել Հայաստանի բարձր տեխնոլոգիաների ոլորտի շարունակական զարգացմանը` հնարավորություն տալով բացահայտել գործարար եւ ներդրումային նոր հնարավորություններ, ստեղծել ընդլայնված մասնագիտական ցանց: Համաժողովի շրջանակում «Ձեռնարկությունների ինկուբատոր» հիմնադրամը համագործակցության հուշագրեր է ստորագրել` մի կողմից, «Դիջիթըլ Փոմըգրանեթ» ՍՊԸ-ի (ITECHNOLOGY) հետ` կրթության, մասնագետների վերապատրաստման, նոր աշխատատեղերի ստեղծման, Գյումրու տեխնոպարկի վերաբերյալ հանրային իրազեկման կազմակերպման եւ իրականացման ուղղությամբ համագործակցության, մյուս կողմից` «ՋԻԷՆՍԻ-ԱԼՖԱ» ՓԲԸ-ի հետ` երիտասարդների մոտ նոր տեխնոլոգիաների նկատմամբ հետաքրքրության աճի, բնակչության շրջանում համացանցի եւ համակարգչի օգտագործման ծավալների մեծացման, կարողությունների զարգացման յուրօրինակ միջավայրի ձեւավորման` խթանման եւ Գյումրու տեխնոլոգիական կենտրոնի տարածքում համատեղ լաբորատորիայի հիմնման ուղղությամբ համագործակցության վերաբերյալ: