Երևանցի 24-ամյա տղամարդը 5 տարեկան աղջնակի հետ փակվել է զուգարանում, մերկացրել է նրան և… 1IN.AM

Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ ավարտվել է Ալիկ Ա.-ի (անունը փոխված է) գործի դատական քննությունը:

24-ամյա Ալիկին մեղադրանք էր առաջադրվել ՀՀ քրեական օրենսգրքի 142 հոդվածի 3-րդ մասի 2-րդ կետով՝ 5 տարեկան աղջնակի նկատմամբ անառակաբարո գործողություններ կատարելու համար:

Ըստ մեղադրանքի՝ Ալիկ Ա.-ն 2014 թվականին ծանոթացել է երևանաբնակ Գալուստ Բ.-ի (անունը փոխված է) հետ: Իմացել է, որ Գալուստը իր բնակարանի մի սենյակը նյութական կարիքից դրդված՝ վարձով է տալիս:

Ալիկը ցանկություն է հայտնել այդ սենյակը վարձելու և վարձակալական հիմունքներով ապրել է այնտեղ՝ Գալուստի ընտանիքի հետ կիսելով ընդհանուր նշանակության սենյակները՝ խոհանոցը, սանհանգույցը:

Բնակարանում ապրել է Գալուստի ընտանիքը՝ Գալուստը, կինը, նրանց որդին ու 2011 թվականին ծնված դուստրը՝ Ալլան (անունը փոխված է):

Հետագայում Ալիկի վարձած սենյակում «հանգրվանել է» նաև նրա եղբայրը: Նույն սենյակում վարձակալական հիմունքներով սկսել են ապրել նաև երիտասարդ ամուսիններ՝ Գեղարքունիքից:

Ըստ մեղադրանքի՝ Ալիկ Ա.-ն տանտիրոջ ընտանիքի անդամների հետ ունեցել է «բարեհաճ փոխհարաբերություններ», սակայն դեպքին նախորդող մեկ-երկու ամիսների ընթացքում ցուցաբերել է տարօրինակ վարքագիծ, մասնավորապես՝ սկսել է չարաշահել ալկոհոլը:

2016 թվականի հունիսի 20-ին, ժամը 19-ի սահմաններում Ալիկն աշխատանքից վերադարձել է անսթափ վիճակում: Նրա եղբայրը հանդիմանել է նրան, պահանջել է, որ Ալիկը քնի՝ սթափվելու համար: Ալիկը եղբորը լսելով՝ գնացել է պատշգամբ, նստել է աթոռին ու քնել է, եղբայրը նույնպես գտնվել է պատշգամբում՝ համակարգչի մոտ:

Ժամը 21-ի սահմաններում աշխատանքից վերադարձել է տանտեր Գալուստը: Կինը գանգատվել է, որ վարձակալ Ալիկը նորից հարբած է եկել, պահանջել է, որ Գալուստը Ալիկին հանի իրենց տանից:

Գալուստը հանգստացրել է կնոջը, ապա զրուցել է մյուս վարձակալի հետ: Այդ ընթացքում նրանց կանայք խոհանոցում ընթրիք են պատրաստել:

Ժամը 22-ի սահմաններում Ալիկն արթնացել է, եղբորից գումար է խնդրել, որ գնա Աբովյան: Վերցրել է գումարը, բայց բնակարանից դուրս չի եկել, գնացել է խոհանոց, փորձել է զրուցել Գալուստի կնոջ հետ: Վերջինս զայրացել է նրա վրա, պահանջել է, որ Ալիկը գնա քնելու: Բայց Ալիկն ասել է, թե մեկնում է Աբովյան, ու դուրս է եկել խոհանոցից:

Ալիկը զրուցել է նաև տանտիրոջ հետ, ասել է, թե Աբովյան է գնում: Գալուստը Ալիկի անսթափ տեսքը նկատի ունենալով՝ հորդորել է, որ նա հետաձգի ուղևորությունը, գնա քնելու: Բայց Ալիկն ասել է, թե պարտադիր պիտի գնա Աբովյան:

Դրանից հետո Գալուստը շփվել է իր 5-ամյա դստեր՝ Ալլայի հետ: Շուտով տանտիրուհին Ալլային կանչել և ուղարկել է հոր հետևից, որ լվացվեն ու ներկայանան ընթրիքի:

Խոհանոցից դուրս գալով՝ աղջնակը մտել է զուգարան՝ քիթը մաքրելու: Երեխայի՝ զուգարան մտնելը տեսնելով՝ Ալիկը նրա հետևից մտել է զուգարան, դուռը ներսից փակել է:

Այնուհետև, ըստ մեղադրանքի, լինելով 18 տարին լրացած անձ, լինելով մեղսունակ, օգտվելով մանկահասակ երեխայի անօգնական վիճակից, Ալիկը նրան բարձրացրել է զուգարանակոնքի վրա, գոտկատեղից ներքև մերկացրել է, իր սեռական օրգանը քսել է երեխայի մարմնին:

Երեխան գոռացել է, բայց Ալիկը փակել է նրա բերանը:

Երեխայի հայրը նկատել է երեխայի բացակայությունը, խոհանոց է գնացել, կնոջը հարցրել է՝ ո՞ւր է Ալլան: Ապա գնացել է զուգարան, բայց տեսել է, որ դուռը փակ է:

Գալուստը թակել է զուգարանի դուռը, հանգցրել-վառել է լույսը, որ ներսում գտնվողը արձագանքի: Գալուստի կինը օդանցքից նայել է զուգարանի ներսը, տեսել է, որ Ալիկը երեխային գրկելով՝ զուգարանակոնքի վրայից մոտեցրել է լվացարանին, ջրով լցված ձեռքով շարժումներ է կատարել նրա դեմքի շրջանում:

Կինը արագ մոտեցել է զուգարանի դռանը, ամուսնու հետ շարունակել են թակել այն՝ պահանջելով բացել:

Այդ ընթացքում, ըստ մեղադրանքի, Ալիկը աղջնակի նկատմամբ կատարած արարքը թաքցնելու նպատակով փորձել է ձևացնել, թե երեխայի քթից արյուն է հոսել, ինքը նրան տարել է զուգարան՝ արյունը լվանալու: Նա ձեռքով ջուր է շփել երեխայի քթին, փորձել է արյունահոսություն առաջացնել, բայց չի ստացվել: Ալիկը, ըստ մեղադրանքի, «մարգանցովկա» է լցրել լվացարանի մեջ՝ տպավորություն ստեղծելով, թե երեխայի քթից արյուն է հոսել: Նա արագ-արագ հացրել է երեխայի շորերը…

Դրանից հետո Ալիկը բացել է զուգարանի դուռը ու վախեցած երեխայի հետ դուրս է եկել այնտեղից… Դռան մոտ տեսնելով երեխայի ծնողներին՝ Ալիկը կմկմացել է՝ ես ոչ մի բան, ես ոչ մի բան…

Դատարանում Ալիկ Ա.-ն իրեն մեղավոր չի ճանաչել: Նա ընդունել է, որ դեպքի օրը աշխատանքից վերադարձել է խմած: Քնել է: Երբ արթնացել է, սթափված է եղել: Ցանկացել է գործով մեկնել Աբովյան: Եղբորից երկու հազար դրամ է ուզել: Երբ տանից դուրս էր գալիս, նկատել է, որ տանտիրոջ երեխան՝ Ալլան, զուգարան մտելիս վայր ընկավ: Ինքը նրան բարձրացրել է: Ինքը Ալլային միշտ վերաբերվել է որպես իր եղբոր երեխայի, հետևաբար չէր կարող նրան որևէ վատ բան անել:

Ալլան իրեն ասել է, թե մայրիկը բարկացել է իր վրա: Ինքը տեսել է, որ երեխայի քթից արյուն է գալիս: Ցանկացել է լվանալ քիթը: Մտել են զուգարան, ինքը փակել է դուռը, քանի որ երեխան ասել է, թե մայրիկից վախենում է:

Երբ երեխայի քիթը լվանում էր, նկատել է, որ զուգարանի վերևի պատուհանից իրեն են նայում, լույսն էլ վառում-անջատում են:

Ինքը բացել է դուռը: Գալուստը անմիջապես հարձակվել է իր վրա, խփել է, երեխայի մայրն էլ է խփել, ասել են՝ ի՞նչ գործ ունես մեր երեխայի հետ: Ինքն ասել է, թե ոչինչ չի արել, խնդիր չկա, կարող են երեխային բժշկի տանել, ինքը ոչ մի անշնորհք բան չի արել…

Հետո նրանք ոստիկանություն են զանգել, երեխային էլ տարել են բժշկի…

Ալիկ Ա.-ն պնդել է, թե երեխայի նկատմամբ սեռական բնույթի գործողություն չի կատարել, չի հասկանում՝ երեխան ինչո՞ւ է նման բան ասում: Ինքը միայն գրկել է նրան, «լվացացրել է», ուրիշ բան չի արել… Իսկ եթե արել է ու խմած լինելու պատճառով չի հիշում, ներողություն է խնդրում…

Երեխային բժշկական զննության ենթարկած մանկաբարձը հայտնել է, որ երեխայի կուսաթաղանթի խախտում չի եղել: Երեխայի մարմնին վնասվածքներ չեն եղել: Քթի շրջանում ու քթանցքներում արյուն չի հայտնաբերվել…

Դատարանը գործով ձեռք բերված ապացույցների համակցությամբ հաստատված է գնահատել առաջադրված մեղադրանքը:

Ալիկ Ա.-ն մեղավոր է ճանաչվել ՀՀ քրեական օրենսգրքի 142 հոդվածի 3-րդ մասի 2-րդ կետով ու դատապարտվել է 3 տարի ազատազրկման:

Պատժի սկիզբը կհաշվվի նրան փաստացի կալանքի տակ առնելու պահից:

1IN.AM