Երևանում երթուղայինների վարորդները գործադուլ են անում

Մալաթիա-Սեբաստիա վարչական շրջանում տարբեր երթուղիներ սպասարկող երթուղային տաքսիները դադարեցրել են ուղևորափոխադրումը, երթուղային տաքսիների վարորդներն այսօր առավոտից բողոքի ակցիա են անում ընդդեմ գազի գնի թանկացման: Ինչպես փոխանցում է մեր թղթակիցը` վարորդները պնդում են, որ կշարունակեն գործադուլն այնքան ժամանակ, քանի դեռ հարցին լուծում չի տրվել: Նրանց խոսքով՝ հարցի լուծման երկու տարբերակ կա՝ կա՛մ պետք է գազի սակագինը նվազեցվի, կա՛մ բարձրացվի ուղևորափոխադրման վարձը մինչև 200 դրամ:

Վարորդները մասնավորապես նշում են. «Մենք չենք պահանջում ուղեվարձը բարձրացնել: Թող միայն գազն էժանացնեն, մեզ ուրիշ բան պետք չի: Մարզերում գազն արժի 170 դրամ, իսկ Երեւանի տարածքում՝ 230 դրամ: Գազալցակայաններում ասում են՝ դոլարի թանկացման պատճառով է, բայց չենք հասկանում՝ մարզերում դոլարը չի թանկացել»:
Գործադուլ անող վարորդները կանգնեցնում են երթուղային գազելներն ու վարորդներին համոզում միանալ իրենց գործադուլին:

Քիչ առաջ բողոքի ակցիա անցկացնող վարորդներին մոտեցավ քաղաքապետարանի տրանսպորտի վարչության պետ Հենրիկ Նավասարդյանը, ով փորձեց հանդարտեցնել վարորդներին՝ համոզելով շարունակել ուղևորափոխադրումը և միևնույն ժամանակ հայտարարելով, որ քաղաքապետարանն իրավասու չէ գազի սակագնի հետ կապված հարցին լուծում տալ և ազդել սակագնի նվազման վրա:
Վերջինս հայտարարեց, որ իրենք գազի թանկացման հետ կապ չունեն, բայց ինքը կփորձի հարցը բարձրացնել վերևների մոտ, որոնք կփորձեն լուծում տալ հարցին: Չնայած Նավասարդյանի կոչերին՝ վարորդները հայտարարեցին, որ չեն դադարեցնելու գործադուլը, քանի դեռ հարցին լուծում չի տրվել: