Երթևեկության կանոնները խախտել է ոչ միայն դերասանուհի Անի Երանյանը, այլև դատավոր Պողոսյանը

Հուլիսի 18-ի երեկոյան վթարի ենթարկված հայտնի դերասանուհի Անի Երանյանը այսօր կեսօրին դուրս է գրվել «Էրեբունի» բժշկական կենտոնից: Այս մասին Armtimes.com-ին ասել են բժշկական կենտրոնից՝ հավելելով, որ Երանյանի առողջական վիճակը լավ է:

Իսկ նրա մեքենայի ուղևոր Հայկ Մխիթարյանի վիճակը դեռ շարունակում է գնահատվել կայուն ծանր: Կայքի հետ զրույցում ասել է «Էրեբունի» բժշկական կենտրոնի վերակենդանացման բաժանմունքի ղեկավար Արմեն Մուրադյանը։ Վերջինս նաև տեղեկացրեց, որ նրան միացված արհեստական շնչառության ապարատը անջատվել է: «Այս պահին վիճակի փոփոխություն չկա»,-ասել է Մուրադյանը, չցանկանալով նշել՝ նրա կյանքին վտանգ սպառնու՞մ է, թե ոչ: Հայկ Մխիթարյանը վթարի հետևանքով ստացել է գանգուղեղային վնասվածք, պարանոցային վեցերերոդ ողի կոտրվածք և կրծքավանդակի ծանր սալջարդ:

Հուլիսի 18-ի երեկոյան դերասանուհի Անի Երանյանի վարած «Հունդայի էլանտրա» մակնիշի ավտոմեքենան Շորժա-Ծովագյուղ ավտոճանապարհի ոչ թույլատրելի հատվածից դուրս է եկել Երևան-Իջևան ավտոճանապարհի 73.6 կմ հատված և դեպի Իջևան ուղղության ավտոճանապարհի երթևեկելի ձախ գոտում բախվել Իջևան ընթացող Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Գագիկ Պողոսյանի վարած «Մերսեդես բենս» մակնիշի ավտոմեքենային:

Վթարի հետևանքով տարբեր աստիճանների մարմնական վնասվածքներ են ստացել երկու ավտոմեքենաների ուղևորները, ովքեր նախ բուժօգնության են դիմել «Սևանի հիվանդանոց», ապա՝ «Հունդայի էլանտրա» մակնիշի ավտոմեքենայի վարորդ Անի Երանյանը և նրա երկու ուղևորները, բուժօգնություն ստանալու համար, տեղափոխվել են «էրեբունի բժշկական կենտրոն», իսկ դատարավոր Գագիկ Պողոսյանը և վերջինիս կինը Մարինե Կարապետյանը բուժօգնություն ստանալուց հետո նույն օրը դուրս են գրվել :

Դեպքի առթիվ առայժմ քրեական գործ չի հարուցվել: ՀՀ քննչական կոմիտեի մամուլի խոսնակ Սոնա Տռուզյանն ասաց, որ ՀՀ քննչական կոմիտեի Գեղարքունիքի մարզային վարչության Սևանի քննչական բաժնում սույն դեպքի առթիվ նյութեր են նախապատրաստվում: Նշանակվել են դատաբժշկական փորձաքննություններ:

Shamshyan.com լրատվական կայքն այսօր տեսանյութ է հրապարակել, որում երևում է, թե ինչպես են բախվում դերասանուհի Անի Երանյանի և դատավոր Գագիկ Պողոսյանի վարած մեքենաները: Առայժմ հստակ չէ Գագիկ Պողոսյանը տվյալ ճանապարհահատվածում գերազանցե՞լ է թույլատրելի արագությունը, թե ոչ, բայց դիտողական զգացողությամբ դատավորի մեքենան բավականին արագ է ընթացել, իսկ Անի Երանյանն էլ նրան չի զիջել:

Կայքի զրույցում փաստաբան Դավիթ Սրապիոնյանը, ով դիտել էր տեսանյութը իր կարծիքը ներկայացրել է, թե վթարի ենթարկված մեքենաների վարորդները ինչ խախտումներ են թույլ տվել: «Ինչ վերաբերում է Անի Երանյանին, ապա ինքը երկրորդական ճանապարհով գլխավոր ճանապարհ է մուտք գործում, այս պարագայում նա պարտավոր է զիջել: Այսինքն՝ պետք է տեսներ, եթե ոչ մի խոչընդոտ չկա, տրանպորտային միջոցներ չկան, միայն այդ դեպքում մուտք գործեր ու շարունակի իր երթևեկությունը: Հրապարկաված տեսանյութից հասկացվեց, որ Երանյանը փորձել է շրջադարձ կատարել, և ինչքան նկատեցի նաև հոծ գիծել է հատել: Այդ առումով Անի Երանյանի կողմից առկա է Ճանպարհային երթևեկության կանոնների խախտում:

Բայց մենք այստեղ ունենք նաև մեդալի հակառակ կողմը: Ինչ վերաբերում է Գագիկ Պողոսյանին, ապա նա իմ կարծիքով խախտել է Ճանապարհային երթևեկության կանոնների 55-րդ կետը, որում ասվում է.«Բնակավայրերից դուրս, ինչպես նաև բնակավայրերում թույլատրվում է երթևեկել 80 կմ/ժ ավելի արագությամբ, տրանսպորտային միջոցների վարորդները պետք է դրանք վարեն երթևեկելի մասի աջ եզրին հնարավորինս մոտ: Այդ դեպքերում արգելվում է զբաղեցնել երթևեկության ձախ գոտիները` ազատ աջ գոտիների դեպքում: Տվյալ դեպքում, երբ դիտում ենք տեսանյութը, Գագիկ Պողոսյանը ձախ եզրագծով ու բավականին արագ երթևեկում է: Այս պարագայում նա պարտավոր էր աջ եզրին հնարավորինս մոտ երթևեկել, նամանավանդ, որ աջ եզրագիծը բավական ազատ էր, այսինքն՝ Պողոսյանը հնարավորություն ուներ աջ գոտիով երթևեկել, ինչը չի արել: Երկրորդ՝ կարծում եմ, որ Գագիկ Պողոսյանի կողմից թույլ է տրվել նաև Ճանապարհային երթևեկության կանոնների 67-րդ կետի խախտում:

Մանրամասները՝ սկզբնաղբյուր կայքում