Երվանդ Զախարյանը խոստովանեց գողությունը

Էներգետիկայի նախարար Երվանդ Զախարյանը, ըստ Ազատություն ռադիոկայանի, հայտարարել է, որ էլեկտրաէներգիայի գնի բարձրացումը Հայաստանից կախված չէ, իսկ պատճառներից մեկն էլ Հայաստանի էլցանցեր ընկերության վատ կառավարումն է: Զախարյանը հայտարարել է, որ գնի թանկացման հայտը հիմնավորված է, հարցը այն է, թե ինչքան պետք է բարձրանա գինը:
Ինչպես հայտնի է, գնի բարձրացման հայտը ներկայացվել է Հանրային ծառայությունները կարգավորող հանձնաժողով: Ներկայացնողը այն ընկերությունն է, որն ըստ Երվանդ Զախարյանի վատ է կառավարել ցանցերը: Դա Ինտեր ՌԱՈ ռուսական ընկերությունն է: Ընկերությունը սեփականության ավելի քան 12 տարիների ընթացքում կուտակել է մոտ 300 միլիոն դոլարի պարտք, համակարգը հասցնելով ճգնաժամի: Ներկայում այդ պարտքը փորձ է արվում դուրս գրել էլէներգիայի թանկացմամբ, այսինքն սպառողի՝ շարքային քաղաքացու հաշվին:
Զախարյանի հայտարարությունը, թե թանկացումը Հայաստանից կախված չէ, մեղմ ասած տարօրինակ հայտարարություն է, նկատի ունենալով այն, որ թանկացման հայտը ներկայացված է Հայաստանի հանրային ծառայությունները կարգավորող հանձնաժողովին: Հետեւաբար այդ որոշումը պետք է կայացնի Հայաստանը՝ թանկացնել, թե ոչ: Այլ հարց է իհարկե, որ Հայաստանը չունի այդօրինակ որոշման ինքնիշխանություն: Փաստացի, Երվանդ Զախարյանը հայտարարում է, որ Հայաստանն ինքնիշխան պետություն չէ:
Դրա համար իհարկե չկար Զախարյանի հայտարարության կարիքը: Իրավիճակն ինքնին խոսում է այդ մասին: Որովհետեւ, եթե Հայաստանը լիներ ինքնիշխան քաղաքականության ունակ պետություն, ապա էլցանցերը ընդհանրապես չէին հայտնվի այն սեփականատիրոջ ձեռքին, որը դրանք հասցրել է սնանկացման ու ճգնաժամի: Եվ ընդհանրապես, Հայաստանի էլցանցերը կմասնավորեցվեին ոչ թե մեկ փաթեթով, այլ առնվազն երկու՝ ինչպես նախատեսված էր դեռեւս 1990-ականների վերջին նախաձեռնված մրցույթով, որն անցկացվում էր Համաշխարհային բանկի մասնակցությամբ եւ որից ռուսական ընկերությունները դուրս մնացին մրցութային պայմաններին չհամապատասխանելու պատճառով: 

մանրանամասները` lragir.am-ում: