Եռյակը վերջնականապես այրել է կամուրջները Դաշնակցության հետ. Հրապարակ

Եռյակը վերջնականապես այրել է կամուրջները Դաշնակցության հետ եւ ՀՅԴ-ին զգուշացրել՝ քանի դեռ իշխանության հետ չի ճշգրտել դիրքորոշումը սահմանադրական բարեփոխումների հարցի վերաբերյալ, տեղ չունի իր շարքերում: Պատահական չէ, որ խորհրդարանական համատեղ աշխատանքների պլանավորման համար հրավիրված եռյակի վերջին նիստը տեղի ունեցավ առանց Դաշնակցության:

ՀՅԴ-ն, ի պատասխան, չմիացավ եռյակի՝ Հայաստանի կառավարման ճգնաժամի վերաբերյալ նախագիծն արտահերթ կարգով օրակարգ ընդգրկելու համար պահանջվող ստորագրահավաքին, իսկ Արմեն Ռուստամյանը բացատրեց, որ նմանօրինակ բոլոր նախաձեռնություններին կողմ են, բայց իրենց համար անթույլատրելի է եռյակի աշխատաոճը: «Եթե մեզ հետ չի քննարկվել, դեմ են տալիս ինչ-որ թուղթ ստորագրել, մենք երբեք դա չենք անի եւ չենք էլ արել»,- վրդովված ասաց Արմեն Ռուստամյանը: Մեր հարցին, թե ինչն է ՀՅԴ-ից երես թեքելու պատճառը, Ռուստամյանը պատասխանեց. «Անհասկանալի է, թե ինչի չեն քննարկել մեզ հետ: Երբ որ նույն 12 կետերից են խոսում, էդ 12 կետերի ձեւավորման մեջ հսկայական դեր ա ունեցել Դաշնակցությունը: Հիմա կանգնել որոշել ու չուզել դա ներկայացնել քառյակի անունից…»:

Դիտարկմանը, որ գուցե եռյակը կարծում է, որ ՀՅԴ-ն իշխանությունների հետ գործարքի մեջ է, այդ պատճառո՞վ իրենց հետ չեն քննարկել, Ռուստամյանը պատասխանեց. «Լսեք, իշխանությունների հետ բանակցությունների մեջ իրենք էլ են: Իրենք էլ իրենց հարցերի շուրջ են բանակցում, հետո կերեւա»: ԲՀԿ-ական Միքայել Մելքումյանին հարցրինք. որ բանակցում էիք, ինչո՞ւ էիք գաղտնի պահում, պատգամավորը մի պահ դադար վերցրեց, ապա, իրեն չկորցնելով, հերքեց բանակցությունների փաստը. «Ինչ վերաբերում է Դաշնակցությանը, այո, մենք իրենց ասել ենք. ճշտեք՝ իշխանության տեսակե՞տն է ձեզ ավելի մոտ, թե՞ մեր, նոր պաժալուստա»: