Ես ասացի չէ՞.ես քարոզիչ չեմ, ես իմ կարծիքն ասել եմ

Վանաձորի՝ ոչ պակաս սկանդալային քաղաքապետ Սամվել Դարբինյանը, ում անունը ժամանակ առ ժամանակ բավականին ուշագրավ պատմությունների հետ է կապվում, Fnews.am-ի հետ զրույցում՝ խոսելով սահմանադրական փոփոխությունների մասին, վստահություն հայտնեց, որ իր ղեկավարած քաղաքում «ԱՅՈ»-ն հավանաբար կհաղթի: Երբ փորձեցինք պարզել, թե ի՞նչ կերպ եւ ի՞նչ մեթոդներով, քաղաքապետը բավականին նյարդային տոնով, համարյա՝ բղավելով, պոռթկաց.
-Բայց ինչ մեթոդներով, ես իմ «Այո»-ն ասել եմ, իմ ժողովրդին էլ բացատրում, հասկացնում եւ տեղ եմ հասցնում, թե ինչ է իրենից ներկայացնում նոր Սահմանադրությունը: Ժողովուրդը նախ պետք է հասկանա՝ ինչ են սահմանադրական փոփոխությունները, ինչքանով ա դա իրան ձեռնտու, եւ նոր գնա ընտրի:
-Իսկ ամոթ չլինի հարցնելը, Դուք հասցրե՞լ եք ծանոթանալ նոր Սահմանադրության կարեւորագույն դրույթներին:

-Ա դե, լավ էլի, վերջացրեք, ոնց չեմ ծանոթացել: Շատ լավ Սահմանադրություն ենք ունենալու:
-Որոշ ընդդիմախոսներ համառորեն փորձում են առաջ քաշել այն տեսակետը, որ իշխող կուսակցությունը՝ ՀՀԿ-ն, այս ճանապարհով իշխանությունը նորից կենտրոնացնում է իր ձեռքում:

-Հիմա, Ձեր կարծիքով, ո՞նց ա:

-Պրն Դարբինյան, ես իմ կարծիքը առիթ կունենամ արտահայտելու, Դուք, որպես ՀՀԿ-ական քաղաքապետ, լավ կլիներ Ձեր տեսակետը հնչեցնեիք:

-Դե որ այդպես է, իմ կարծիքն էլ թող ինձ մնա:

-Գաղտնի՞ք է։

-Իյա՜, 2005 թթ-ից ժողովուրդը, ընդդիմությունն էլ ուզում են, որ փոփոխություն լինի: Եւ իշխանությունն էլ, հենց ժողովրդի ցանկությամբ, ուզում է իրականացնել դա, սկսում են: Նման բան չկա: Դա ժողովրդի, ընդդիմադիր կուսակցությունների պահանջն է եղել: Իշխանությունն էլ, ընդառաջ է գնացել սեփական ժողովրդին եւ ընդդիմադիր կուսակցություններին: Եւ սահմանադրական բարեփոխումների փաթեթն էլ ներկայացրել է ժողովրդին: Հիմա ժողովուրդը «այո» կքվեարկի՝ լավ, «այո» չի քվեարկի՝ էլի լավ, ինչ ա եղել որ:
-Բայց այդպես էլ չխոսեցիք նոր Սամանադրության դրույթներից գոնե մեկի մասին...

-Ես ասացի չէ՞. ունենալու ենք շատ լավ Սահմանադրություն, որը բխում է ժողովրդի շահերից:

-Այդքա՞նը: Իսկ ինչպե՞ս եք տեղերում՝Ձեր տարածքներում, կազմակերպելու «Այո» -ի քարոզարշավը:

-Ես ասացի չէ՞ ես քարոզիչ չեմ, ես իմ կարծիքն ասել եմ, Սահմանադրական փոփոխությունները մի քանի քայլ առաջ են…Ամբողջ աշխարհում էլ այդպես է ընդունված, պառլամենտական կառավարման ձեւը մի քանի քայլ առաջ է, քան նախագահական կառավարման ձեւը:

-Իսկ կարո՞ղ եք մատնանաշել, օրինակ, ի՞նչ կփոխվի վանաձորցիների կյանքում սահմանադրական բարեփոխումներից հետո:

-Դուք երեւանցի՞ եք, թե՞ վանաձորցի:

-Երեւանցի եմ:

-Հիմա երեւանցիների կյանքում ի՞նչ ա փոխվելու: Սահմանադրական փոփոխությունները մենակ վանաձորցիների համար չեն: Ինչ որ Երեւանում կփոխվի, մի քանի անգամ ավելի էլ Վանաձորում կփոխվի:

-Կեցցեք դուք: 

Տաթեւիկ  Աբրահամյան