Էս էգերն էկել որձ են դառել. Սասուն Միքայելյան (Video)

1in.am-ը գրում է. «Էս էգերն էկել որձ են դառել. ամոթ մեզի»,- այսօր ազատամարտիկների մեծ հավաքի ընթացքում ասաց «Սասուն» ջոկատի հիմնադիր հրամանատար, «Քաղաքացիական պայմանագրի» կառավարման խորհրդի անդամ Սասուն Միքայելյանը՝ անդրադառնալով իր մարտական ընկերների դեմ իրականացված ոտնձգություններին:

Նա նշեց, որ հավաքվել են սուրբ վայրում՝ Եռաբլուրում, որտեղ ամփոփված են զոհասեղանին իրենց գլուխները դրած եղբայրների դիերը, ու իրենք՝ ողջերը, պարտավոր են պահել նրանց պատիվը: «Մենք մեր զինված եղբայրների կենդանի հոգիներն ենք: Եթե այսօր ոտնձգություն է լինում նման կարգի լեգենդար հրամանատարների դեմ, նշանակում է՝ պղծվում է Եռաբլուրը»,- ասաց Սասուն Միքայելյանը:

Նա նշեց, որ ինքը որձ է, ազատամարտիկ, ու ամոթ է նույնիսկ, որ ինքը քաղաքում ֆռռա, քանի որ խեղճի, անտերի, քյասիբի թասիբը ով պետք է պահի, եթե իրենց են ծեծում: Հերիք եղավ: Նա իր մարտական ընկերներին կոչ արեց թողնել քաղաքական խաղերն ու քաղաքական պոռնիկներին և զբաղվել երկրի ճակատագրի փրկությամբ, մոռանալ, թե ով է եղել հարթակին 2008-ին, քանի որ բոլոր բացականերն այսօր ներկա են, և պետք չէ ուշադրություն դարձնել նման հարցերի:

Նրա խոսքով՝ պետք է համախմբվել և գործողությունների ծրագիր մշակել, այնպես համախմբվել, որ միանան բոլոր ազատամարտիկները՝ անկախ քաղաքական պատկանելությունից: Սասուն Միքայելյանը հիշեցրեց իր ձերբակալությունը՝ ասելով, որ իրեն ձերբակալեցին այնպես, որ ժողովրդին ցույց տան՝ եթե Սասուն Միքայելյանի նման տղաների հետ կարող են նման կերպ վարվել, ով է ժողովուրդը: Նույնը, նրա խոսքով, տեղի է ունենում այսօր, երբ ծեծի են ենթարկվում ազատամարտիկ հրամանատարները: «Բա մենք տղա ենք, բա մենք որձ ենք եղել, էս էգերն էկել որձ են դառել: Ամոթ մեզի»,- ասաց Սասուն Միքայելյանը:

Հիշեցնենք, որ դեկտեմբերի 10-ի հանրահավաքի ժամանակ ազատամարտիկ Սմբատ Հակոբյանն էր տեղեկացրել, որ այսօր հավաք է անցկացվելու: Եռաբլուր էին ժամանել մարզերից, քանի որ նրանց խիստ վրդովեցրել են իրենց մարտական ընկերների նկատմամբ կատարվող բռնությունները: