Ես սա համարում եմ 2018թ. հեղափոխության ամենագլխավոր ձեռքբերումը. ԲԴԽ նախագահի ուշագրավ պատասխանը

Հայտնի է, որ ապրիլի կեսերին կասեցվել է ԲԴԽ նախագահ Ռուբեն Վարդազարյանի լիազորությունները: ԲԴԽ նախագահի պարտականությունները այս պահին կատարում է խորհրդի՝ տարիքով ավագ անդամ Գագիկ Ջհանգիրյանը։

Նշենք, որ Բարձրագույն դատական խորհրդի (ԲԴԽ) նախագահ Ռուբեն Վարդազարյանի դեմ քրեական գործ է հարուցվել, դա է հիմք հանդիսացել նրա լիազորությունների դադարեցման համար։

Ի՞նչով է զբաղվում այսօր Ռուբեն Վարդազարյանը, արդյո՞ք պատրաստվում է իր լիազորությունների դադարեցման հետ կապված որեւէ իրավական գործընթաց սկսել, ի՞նչպես է Ջհանգիրյանը զբաղեցրել վերջինիս աշխատասենյակը,  ի վերջո դատարաններն այսօր անկախ ե՞ն, թե՞ ոչ հարցերի պատասխանը «Իրավունքը» փորձեց ստանալ անձամբ ՌՈՒԲԵՆ ՎԱՐԴԱԶԱՐՅԱՆԻՑ, ով անդրադառնալով իր դեմ հարուցված ք. գործին նկատեց.

-Չեմ ուզում որակեմ, չեմ ուզում որեւէ պիտակ կպցնեմ այս ամենին, ժամանակը կգա ամեն ինչ պարզ կլինի:

-Օրինական ե՞ն` այսինքն այն գործողությունները, որոնք իրականացվեցին Ձեր դեմ:

-Միանշանակ ոչ:

-Իսկ այդ որոշումները բողոքարկելու որեւէ իրավական գործընթաց իրականացնում եք ինքներդ:

- Այո, արդեն սկսել եմ, բողոքներ եմ ներկայացրել:

-Ի՞նչ բողոքներ:

-Բողոքներ եմ ներկայացրել երկու որոշումների դեմ` քրեական գործ հարուցելու եւ մեղադրանք առաջադրելու որոշման դեմ:

-Պարոն Վարդազարյան, մամուլում տեղեկություն հրապարակվեց, որ Ջհանգիրյանը փորձել է անօրինական ներծուժել Ձեր աշխատասենյակ` այդպե՞ս է:

-Այո, ցավոք իրականություն է դա: Այսօր այդ անձը իմ աշխատեսնյակում է արդեն դիրքավորվել:

-Պարոն Վարդազարյան, ներկա իշխանությունները պարբերաբար բարձրաձայնում են, որ դատարանները անկախ չեն, եւ, որ դատավորները շարունակում են «վնգստալ»:

-Իմ խորին համոզմամբ դատական իշխանությունը այսօր իրականում անկախ է: Եվ ես սա համարում եմ 2018թ. հեղափոխության ամենագլխավոր ձեռքբերումը: Ինչքան էլ ո քաղաքական իշխանոջթյունը փորձում է փնովել, քննադատել դատարաններին, այնուամենայինվ, ժամանակը կանցնի եւ դա իրենք իրենց վրա կզգան: Վստահ եմ, որ երբ այսօրվա գործող իշխանությունը դառնա ընդդիմություն այդ ժամանակ կգնահատի, թե ինչ է նշանակում անկախ դատական իշխանություն` այդ ժամանակ կհասկանա, թե ինչ է նշանկում արդար դատարան:

մանրամասն՝Iravunk.com-ում:

Զրույցը՝ԻԼՈՆԱ ԱԶԱՐՅԱՆԻ