4 Նոյեմբեր, 2013

Ես սովորական տղա եմ, ով երբեք չի երազում լավագույն ֆուտբոլիստ դառնալու մասին. Մխիթարյան

Դորտմունդի «Բորուսիայի» հայ կիսապաշտպան, ակումբի պատմության ամենաթանկարժեք ձեռքբերումը՝ Հենրիխ Մխիթարյանը, գերմանական Die Welt-ին տված հարցազրույցում խոսել է Բունդեսլիգայում իրենց հիմնական մրցակցի՝ Մյունխենի «Բավարիայի» մասին, ինչպես նաև պատասխանել է հարցին, թե ինչու չի տեղափոխվել Անգլիայի Պրեմեիր լիգա և ինչու է հիանում Յուրգեն Կլոպով: -Ինչո՞ւ եք ընտրել «Բորուսիան». կային լավ առաջարկներ Անգլիայից: -Այո, ամառային տրանսֆերային պատուհանի ժամանակ ես ընտրության մի քանի տարբերակ ունեի, սակայն ընտրեցի «Բորուսիան», քանի որ ինձ դուր է գալիս այստեղի ֆուտբոլը, խաղային ոճը: Չեմպիոնների լիգայի շրջանակներում Դոնեցկի «Շախտյորի» կազմում ես խաղացել եմ «Բորուսիայի» դեմ: Այս թիմը ոչ միայն ֆանտաստիկ ֆուտբոլ է ցուցադրում, այլ նաև այնպիսնն, որն ինձ հարմար է: Ես մտածեցի, որ սա մի թիմ է, որտեղ կարող եմ աճել: -«Բորուսիան» քո տրանսֆերի համար վճարեց 27.5 մլն եվրո, սակայն դուք ինքներդ՝ տեղափոխվելով Անգլիա, կարող էիք ավելի շատ գումար վաստակել: -Այո, հնարավոր էր, սակայն ֆուտբոլում փողն այնքան էլ կարևոր չէ: Փողն ինձ համար առաջնայինը չէ: Ես սիրում և զգում եմ ֆուտբոլը, մտածում եմ ֆուտբոլի մասին: Իսկ եթե ես լավ ելույթ ունենամ, այսպես, թե այնպես կվաստակեմ այդ գումարները: Եկել եմ Դորտմունդ, որպեսզի ֆուտբոլ խաղամ, այլ ոչ թե նստեմ պահեստայինների նստարանին, ինչի վտանգը կար Անգլիայի Պրեմիեր լիգայում: -Հայաստանում Դուք երեք անգամ դարձել եք տարվա լավագույն ֆուտբոլիստ: Ձեզ զգո՞ւմ եք ազգային հերոս: -Ոչ, իհարկե ոչ: Ես սովորական տղա եմ, ով երբեք չի երազում լավագույն ֆուտբոլիստ դառնալու մասին: Իհարկե, ես ճանաչվել եմ տարվա լավագույն ֆուտբոլիստ, ինձ ճանաչում են փողոցներում և ինքնագիր են խնդրում: Ես սրտանց տալիս եմ, քանի որ դա ֆուտբոլիստի կարիերայի մաս է կազմում: Եթե այդ ամենը մարդկանց երջանիկ է դարձնում, ապա դա ինձ նույնպես երջանկացնում է, բայց ես ինձ աստղ չեմ համարում: -Դորտմունդում Ձեր հայրենիքից ինչ-որ բան պակասո՞ւմ է: -Ոչ (ծիծաղում է). մայրս և տատիկս ինձ պարբերաբար այցելում են: -Մինչ մրցաշրջանի մեկնարկը բոլոր փորձագետները պնդում էին, որ Գերմանիայի չեմպիոն չի կարող լինել որևէ այլ ակումբ՝ բացառությամբ Մյունխենի «Բավարիայի»: -Միայն կարող եմ ասել, որ մենք կանենք հնարավոր ամեն ինչ, որպեսզի հաղթենք յուրաքանչյուր խաղում, իսկ մրցաշրջանի վերջում կտեսնենք, թե ինչպես կդասավորվեն դեպքերը: -Արդյո՞ք «Բորուսիան» Չեմպիոնների լիգայի ֆավորիտ է համարվում: -Այս մրցաշարում ֆավորիտներ չկան: Սա մի մրցաշար է, որտեղ դու չպետք է շատ սխալներ թույլ տաս, ուստի այստեղ հարցը ոչ միայն թիմի ցուցադրած որակների, այլ նաև կայունության մասին է: -Այս շաբաթ լավ նորություն եղավ. թիմի գլխավոր մարզիչ Յուրգեն Կլոպը մինչև 2018 թվականը երկարաձգեց պայմանագիրը: -Իսկ ո՞վ է ասում, որ դա լավ նորություն է (ծիծաղում է): Եթե ավելի լուրջ, ապա դա հիանալի նորություն էր, քանի որ շատ հաճելի է աշխատել նրա հետ: Կլոպը ոչ միայն հիանալի մարզիչ է, այլ նաև հիանալի մարդ է: Թարգմանությունը` Armsport.am-ի: