«Ես թքած ունեմ մնացածի բիզնեսների վրա, ինձ համար իմ բիզնեսն է կարևոր».Աշոտ Աղաբաբյան

Բոլորովին վերջերս Ֆինանսների նախարարությունը ստուգումներ էր իրականացրել ԱԺ ՀՀԿ-ական պատգամավոր Աշոտ Աղաբաբյանին` Բուռնաշին պատկանող «Հրազդան» տոնավաճառում, որի  արդյունքում տուգանք էր սահմանվել 60 մլն դրամի չափով: Պատգամավոր Աղաբաբյանն էլ հայտարարել եւ դատի էր տվել հարկային մարմիններին, ասելով որ այդ խախտումները, որը հայտնաբերել է հարկային մարմինը, հիմնավորված չէ, չկան փաստեր եւ փաստաթղթեր, ուղղակի փորձ են արել գործ սարքել : «Սահմանել են տուգանք՝ 50 մլն դրամից ավելի, որը տույժ-տուգանքով կազմում է 60-62 մլն դրամ: Կարեւորը դա չէ.կարեւորն այն է, որ մենք այսօր հազիվ կարողանում էինք փակել այն վարկը, որը վերցրել ենք ստադիոնը վերականգնելու համար: Այսօր դարձրեցին մեծ պրոբլեմ: Այսօր մենք հարկայինի փողը չենք տալիս, որ բանկի փողը տանք: Այ, այս իրավիճակի մեջ ենք հայտնվել»-այս թնջուկի համատեքստում շաբաթներ առաջ հայտարարել էր Հրազդան տոնավաճառի սեփականատեր Աշոտ Աղաբաբյանը:
Պարզելու համար, թե ո՞ր փուլում է գտնվում Աշոտ Աղաբաբյան-հարկային մարմիններ հակամարտությունը, Fnews.am-ի թղթակիցը կապ հաստատեց Աշոտ Աղաբաբյանի հետ, ով մեզ հետ զրույցում փոխանցեց.

-Այսօր դատի օրն է , ես դատարանում եմ և միայն դատի ավարտից հետո կհայտարարեմ, թե ինչ ստացվեց վերջում, ով եփեց ճաշն ու ինչ գցեց մեջը:
-Պարոն Աղաբաբյան, համառ լուրեր են շրջանառվում այն մասին, որ Դուք հնարավոր է խզեք Ձեր կապերը ՀՀԿ-ի հետ եւ դուրս գաք ՀՀԿ-ից: Ձեր մեկնաբանությունը:
-Նման բան չկա, ով ինչ հասնում ասում է , գրում ու դա դառնում է մամուլի տեսություն: Տեսնես ում մտքով է դա անցել, որ ես ուզում եմ կապերս խզել ՀՀԿ-ի հետ, եւ ում է դա ձեռնտու:

-Իսկ ըստ Ձեզ, ո՞վ է պատասխանատու այսօրվա տնտեսական ծանր վիճակի համար. ինչո՞ւ է տնտեսական բլոկը հայտնվել կռախի առաջ, եւ արդյո՞ք տնտեսական քաղաքականության ձախողման համար պատասխանատու չէ նաեւ երկրի ներկայիս կառավարությունն ու նրա ղեկավարը:

ԿԱՌԱՎԱՐՈՒԹՅՈՒՆՆ ԱՄԵՆԱՄԵԾ ՄԵՂՔԻ ԲԱԺԻՆՆ ՈՒՆԻ 

-Երկրի սնանկության մեղավորը մեզանից յուրաքանչյուրն է. մենք ենք, բոլորս: Բայց կառավարությունն իհարկե մեղքի ամենամեծ բաժինն ունի: Ես չեմ մեղադրում ո'չ վարչապետին, ո'չ էլ մյուսներին, մենք բոլորս մեղքի մեր բաժինն ունենք:

-Ճի՞շտ է, որ Գագիկ Ծառուկյանը շարունակում է խանգարել Ձեր բիզնեսի առաջխաղացմանը:
-Երբ մի երկրում շատերը բիզնես են ունենում, սկսում են մեկը մյուսին խանգարել, ոչ թե կոնկրետ Ծառուկյանն է ինձ խանգարում, այլ մյուս բիզնեսմեններն էլ: Ամենքի համար իր բիզնեսն է կարևոր, իր եկամուտը, ես թքած ունեմ մնացածի բիզնեսների վրա, ինձ համար իմ բիզնեսն է կարևոր:

Աննա  Առաքելյան