Եթե աղքատության շեմը 17 հազար դրամից բարձր դնեին, այն կհասներ 80 տոկոսի. Վարդան Բոստանջյան

Համաշխարհային պարենային կազմակերպությունը կանխատեսում է գնանկում, սական Հայաստանում նկատվում է գների աճ:

Այն մասին, թե ինչով է սա պայմանավորված, այսօր լրագրողների հետ խոսեց տնտեսագետ Վարդան Բոստանջյանը:

Նրա խոսքով` այս երևույթի պատճառներն բազում են: Նախ` բացակայում է ազատ մրցակցությունը: Այս պայմաններում ընդամենը մի քանի ընկերությունների է հաջողվում շրջանառություն կազմակերպել: Ակնհայտ է, որ երկրում առկա է եկամուտների խիստ բևեռացում:

«Հայաստանում ամբողջ հարստությունը մի քանի մարդկանց ձեռքում է կենտրոնացած, ում այնքան էլ չի հետաքրքում գների աճը: Պաշտոնական տվյալներով աղքատության մակարդակը 34 տոկոս է, ընդ որում, որպես աղքատության շեմ, ամսական 17 հազար դրամն է դիտարկվում: Սա զավեշտ է, որովհետև, 18 հազար դրամով մարդիկ չեն կարող հոգալ իրենց տարրական կարիքները: Այս պահի դրությամբ 1 ամսվա շրջանակներում առնվազն 100 -120 հազար դրամը կարող է հասցնել այն վիճակի, որ գոնե չգտնվենք խոցելի վիճակում: Եթե շեմը 17 հազար դրամից բարձր դնեին, աղքատությունը կհասներ 80 տոկոսի: Մարդիկ այս գնաճի պայմաններում չեն կարողանում գնել կենսապահովման անհրաժեշտ ապրանքները»,- ասաց Վարդան Բոստանջյանը:

Ըստ հաշվարկների` նորմալ կենսագործունեության ապահովման համար անհրաժեշտ է 2100 կկալ էներգիա: Դա բավարար է առողջ կյանք ունենալու համար. «Սակայն Հայաստանում մի ստվար զանգված, կարող է չապահովել այդ գիծը միջոցների բացակայության պատճառով: Դրանով պայմանավորված՝ մենք կազմում ենք սպառողական զամբյուղը: Մեզ չի հաջողվում ապահովել նորմալ կենսապահովման զամբյուղ՝ հաշվի առնելով եկամուտները: Գների այս պայմաններում ՀՀ-ում նվազագույն զամբյուղը պետք է արժենա 100-120 հազար դրամ»,- ասաց Բոստանջյանը:

ankakh.com