«Եթե չլիներ Սեյրանի հայրը ես փոքր ախպորս հողի տակ չէի դնի»...

"Հենց իրենք են ինձ ու տղերքիս ծեծել, ես գետնին ընկած ծեծվում էի երեք ախպերների կողմից, ես ոն՞ց կարայի նկատեի, որ Սեյրանը ուզում է խփի: Հա ես ասել եմ, որ տղա ես հորդ թասիբը պահի, ինչ ես կանգնել տեսնում ոնց են հորդ զարկում, բայց ջղայնացած եմ եղել, հո չեմ ուզեցել, որ տա սպանի էդ տղուն: Հետո գիտեք ինչ բոլորը ներկայացնում են, որ ինքը եկել էր բաժանելու, սկի էլ էդպես չի, ինքն էլ երկու ախպերների հետ հարձակվել էր վրաս` ինձ էին ուզում սպանեին, խեղդում էին, կարելի է ասել մահամերձ էի, փաստորեն էրեխես էլ տ"սավ ու... Իրենց հորը իրենց տարիքի տղա անպատվում էր, ծեծում, ես էլ չասեի, բա Դուք էլ եք տղա Ձեր հորը բան են ասում, խի եք կանգնել: Բայց հո չէի ասում տուր սպանի, տղաս հո չէր ուզում սպաներ, հիմա դեպք է եղել ա, ոչ մեկ չէր ուզում Վարդանի կամ մեկ ուրիշի մահը, ստացվեց",-Fnews.am-ի հետ զրույցում այսպես ներկայացրեց կատարվածը, օրեր առաջ Կուրթան գյուղում 16-ամյա Վարդան Գեւորգյանին դանակի մահացու հարված հասցրած Սեյրանի հայրը: Իսկ 16-ամյա սպանված տղայի եղբայրը չցանկացավ ոչինչ խոսել, նշելով, որ իրենց վիշտը խեղդած է պահում, միայն ասաց."Սեյրանը գիտակցել է այդ պահին ինչ էր անում, ու հենց խփելուց հետո խառնվեց իրար, բայց հերը դեռ իր տարերքի մեջ էր, չէր հանգստանում: Եթե չլիներ Սեյրանի հայրը ես փոքր ախպորս հողի տակ չէի դնի, էսքան ողբերգությունն էլ չէր լինի, միակ մեղավորը հայրն է":

Ավելի վաղ հայտնել էինք, որ օգոստոսի 28-ին «որովայնի առաջնային պատի ծակած-կտրած վնասվածքով» Ստեփանավանի բժշկական կենտրոն է ընդունվել Կուրթանի բնակիչ, 16-ամյա Վարդան Գեւորգյանը, որը գիտակցության չգալով մահացել է: Սպանությունը կատարելու կասկածանքով նույն օրը ձերբակալվել է Կուրթան գյուղի բնակիչ Սեյրան Գեւորգյանը: Նա խոստովանել է, որ դեպքի օրը՝ օգոստոսի 28-ին՝ ժամը 20:00-ի սահմաններում, ինքն է իր կողմից օգտագործվող դանակով հարվածել Վարդան Գեւորգյանին: Նրան մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Սեյրան Գեւորգյանը կալանավորված է:

Տաթեւիկ Աբրահամյան