Եթե Հայաստանը նավթ ու գազ ունենար

Lragir.am-ը գրում է .
«Կոռուպցիայի և կազմակերպված հանցավորության հետազոտությունների վերլուծական կենտրոնը» (OCCRP) հրապարակել է տեղեկություն Մոսկվայի մերձակայքում էլիտար տարածքում Ադրբեջանի նախագահ Իլհամ Ալիեւի առանձնատան մասին, որը մի քանի րոպե է հեռու այդ էլիտար հատվածում գտնվող Պուտինի նստավայրից:

Ալիեւների համաշխարհային ունեցվածքի մասին տեղեկությունները վերջին տարիներին դուրս են լողում կանոնավոր պարբերականությամբ: Մեկ նրանց օֆշորային հաշիվներին են գաղտնազերծվում, մեկ այս կամ այն երկրում գտնվող պատմական դղյակները, հիմա էլ Պուտինի հետ առանձնատնա-նստավայրային հարեւանությունը:

Դժվար է ասել, թե ինչ է կատարվում Հայաստանի իշխանության՝ բարձրաստիճան պաշտոնյաների հոգում, երբ տեղեկանում են, որ Ալիեւն օրինակ Պուտինի հարեւանն է, իսկ իրենք ընդամենը հարեւան են միմյանց կամ էլ առավելագույնը՝ Բիբինին: Ինչ խոսք, հետաքրքիր կլինի, երբ մի օր ջրի երես դուրս գա այն ամենը, ինչ արտերկրում ունեն Հայաստանի պաշտոնյաները՝ նախկին, թե ներկա: Բայց, կասկածից վեր է, որ նրանց ունեցածը օբյեկտիվորեն անհամեմատելի կլինի Ալիեւների հետ, քանի որ նավթն ու գազն անշուշտ ստեղծել են անգերազանցելի առավելություն:

Մյուս կողմից, Հայաստանի պաշտոնյաները տխրելով, որ Ալիեւը Պուտինի հարեւանն է, իսկ իրենք՝ ոչ, միեւնույն ժամանակ կարող են նաեւ գոհ լինել Ալիեւների ունեցվածքի մասին հրապարակումներից: Բանն այն է, որ այդ հրապարակումները հմտորեն օգտագործելու դեպքում կա հնարավորություն հանրության մոտ ներկայանալ ոչ թե կոռումպացված, այլ սոցիալապես անապահով խավ: «Հապա մի նայեք, մեզ եք ասում կոռումպացված, մինչդեռ տեսեք, թե Ալիեւներն ինչ են», կարող է ասել Հայաստանի «վերնախավը», ցույց տալով Մոնումենտի կամ այլ հայաստանյան «էլիտար» հատվածների իրենց տները: Մի՞թե դրանք հնարավոր է համեմատել Ալիեւների ունեցվածքի հետ:

Մանրամասն ` սկզբնաղբյուրում: