Եթե Նիկոլ Փաշինյանը կարողանա ճիշտ մարդկանց ընտրել, ապա նա կկարողանա արդյունավետ աշխատել

Ներքաղաքական ներկա գործընթացների շուրջ, Fnews.am-ը զրուցել է Այս «Ֆիդայիներ» ՀԿ-ի նախագահ Սեյրան Չիլինգարյանի հետ: 

-Պարոն Չիլինգարյան, Ձեր կարծիքով, ինչի՞ հետեւանք էր համաժողովրդական այս շարժումը: Որքանո՞վ կարող է այն փոփոխությունների տանող ճանապարհ լինել:

-Ինձ թվում է պոռթկում եղավ, քանի որ ՀՀԿ-ն ինքն իրեն ճանաչել էր անպատժելի ՝ բոլոր առումներով: Արդեն հասունացել էր մի պահ, որ որեւէ կերպ հնարավոր չէր ՀՀԿ-ի «դեմն առնել»: ՀՀ-ում մի քանի հոգի իրենց անպատժելի էին զգում և իրենց կողքին էլ աճեցրել էին մի քանիսին, որոնց դաստիարակել էին իրենց անպարտելի ու անդաստիարակ ոգով:

-Արդյո՞ք շարժումը հայկական էր, թե՞, այնուամենայնիվ, կարող էին լինել որոշակի աշխարհաքաղաքական գործոններ:

-Ես շատ լավ տեղեկացված եմ, թե ով ում հետ է խառը գործերի մեջ. ով է արդար, եւ ով ինչում է շահագրգիռ:
Այդուհանդերձ՝ սա հայկական շարժում էր: Եթե հանկարծ ինձ մոտ անգամ չնչին կասկած անգամ  լիներ ՝ ես հանրությանը կասեի: Այս պարագայում՝ ես չեմ տեսնում ոչ մի գործոն դրսից, սա ժողովրդի տարիների հիասթափության պոռթկումն էր : Նիկոլը կարողացավ հավաքել իր շուրջը նրանց, ովքեր սպասում էին, որ մի օր կգա մեկը, ով կփորձի երկրում արդարություն հաստատել: Ժողովուրդը հավատում է Նիկոլ Փաշինյանին: Այս պրոցեսների մեջ ո՛չ կաշառք կար, ո՛չ խառը մարդիկ... ամեն ինչ թափանցիկ էր՝ լրագրողների ու մարդկանց առաջ: Ու ես զարմացած եմ. սա առաջին դեպքն է մեր երկրում: Անկեղծ ասած, ինձ համար էլ սա շատ զարմանալի էր,բայց ես ուրախ եմ, որ վերջապես մաքուր շարժում եղավ: Հիմա երևի վերջնական հանգուցալուծումը մոտ է ՝ դրական տեղաշարժով:

-Ի՞նչ կփոխվի երկրում, եթե Նիկոլ Փաշինյանը դառնա վարչապետ. կապրե՞նք մեր երազած ազատ և արդար Հայաստանում:

-Շոշափելի արդյունք հաստատ կլինի: Բայց դա չի նշանակում, որ մենք մայիսի 8-ին կարթնանանք լրիվ նոր Հայաստանում: Այս երիտասարդները, որ հիմա Նիկոլի կողքին են, չպետք է շուտ հիասթափվեն : Նրանք պետք է կանգնեն Նիկոլ Փաշինյանի կողքին, օգնեն նրան, չէ՞ որ մի օրում երկիր չեն կառուցում:
Ինձ թվում է,  եթե Նիկոլ Փաշինյանը կարողանա ճիշտ մարդկանց ընտրել և հավաքել իր շուրջը, ապա նա կկարողանա շատ արդյունավետ աշխատել: Նա իր թիմակիցներին պետք է ընտրի ՝ հաշվի առնելով նրանց մարդկային տեսակը ևս:

- Ի՞նչ դիրքում կհայտնվի ՀՀԿ-ն:

-ՀՀԿ-ն եղել է Սերժ Սարգսյանով, եւ մենք էլ մշտապես նրան ենք զորավիգ եղել:
Իսկ հիմա՝ ինձ թվում է, ՀՀԿ-ում նրան փոխարինող կարծես թե չկա:
Կան մի քանի կիրթ մարդիկ, որոնք միգուցե հետո մնան Նիկոլի կողքին՝ որպես գործից գլուխ հանողներ: Այնուամենայնիվ, ես կարծում եմ, որ ՀՀԿ-ն կբաժանվի թեւերի:
Կամ էլ Կոմունիստների հետ կոալիցիա կկազմեն և մի բանով կզբաղվեն:
Պետք չէ այդքան երես դեմ տալ ՝ թող զիջեն իրենց տեղն ու հաջողություն մաղթեն Նիկոլին: ՀՀԿ-ն որոշներին պետք է ուղղակի հեռացնի իր շարքերից՝հատկապես ստախոսներին ու այն լկտիացած հատվածին, որոնց թվում է՝  ամեն բան իրենց կարելի է:

-Ըստ Ձեզ, Նիկոլ Փաշինյանը , ի սկզբանե համոզվա՞ծ էր, որ համաժողովրդական շարժումը հաղթելու է:

-Երբ այս ամենը սկսվեց, հավանաբար, նա չէր էլ մտածում, որ ամեն ինչ այսպիսի ընթացք կունենա: Նա իր իրերը վերցրեց, ուսերին գցեց ու ոտքով ճանապարհ ընկավ: Նման դեպքեր գրեթե չեն լինում: Ուղղակի նա տեսավ, թե որքան հիասթափված է ժողովուրդը, որքան ասելիք ունի, և որքան է սպասել այդ օրվան: Եվ եթե նա կարողացավ իր շուրջը հավաքել այդքան մարդու և այսքան ժամանակ պայքարել բոլորի աչքի առաջ՝ անկաշառ ու արդար, լրագրողներից չփախչելով, ուրեմն իրոք ունի արդար նպատակներ:
Հնարավոր է ,որ նա չի էլ մտածել վարչապետ դառնալու մասին, բայց քանի որ դեպքերը նման ընթացք են ունեցել, նա որոշել է , իր արածը կիսատ չթողնել:
-Ես կարծում եմ, որ նա այս ամենն արել է՝ ոչ թե վարչապետ դառնալու, այլ ուղղակի ինչ-որ բան փոխելու համար: Այսինքն՝ նպատակը երկրում իրավիճակ փոխելն է եղել, եւ հիմա էլ արդեն հասունացել է պահը՝ իր վրա մեծ պատասխանատվություն վերցնելու: Իսկ ինչու՝ոչ:

-Ելք կուսակցության անդամները, հավատարիմ կմնա՞ն հետագա գործընթացներում, թե՞…

-Մաքուր մարդիկ են պետք Նիկոլին: Ինձ թվում է՝ նրանք կմնան, քանի որ քաջ գիտակցում են, որ այլ ելք չկա՝ քաղաքական իրադրությունը փրկելու, եւ երկիրը այս իրավիճակից դուրս բերելու համար:
Ես չգիտեմ ՝ բարձր պաշտոններ կունենան թե ոչ, բայց որ կմնան իր թիմում ՝ հաստատ է: ՀՀԿ-ից էլ որոշները կմնան, միգուցե ոչ առաջին դեմքերի մակարդակով, բայց հաստատ կմնան: Չէ՞ որ փորձառու մասնագետը միշտ էլ պետք են : Ուղղակի պետք է այնպես անել, որ չառաջնորդվեն հին սկզբունքներով:

-Իսկ ի՞նչ է սպասվում գործարար հատվածին: Կարծիք կա, որ հատկապես մոնոպոլիստներին այնքան էլ լավ օրեր չեն սպասվում:

-Դե գիտեք ոնց ՝ պետք է ամեն ինչ օրինականացնել, բոլորին բերել հարկային դաշտ : Հիմա ՀՀ-ում ամեն ինչ մի քանի մարդու ձեռքում է : Այդպես չի կարելի. Բոլորի համար պետք է ստեղծվեն հավասար պայմաններ:
ՀՀ-ում գործարարները կապվում են առաջին դեմքերի հետ ու դառնում անվերահսկելի: Պետք է ամեն ինչ վերցնել հսկողության տակ: Բոլորը պետք է իմանան, որ յուրաքանչյուրն մարդ՝ ուզում է ապրել արժանապատիվ:

Ա. Առաքելյան