«Եթե պարզվի, որ մեղավոր է Սուրիկ Խաչատրյանի որդին, նա կպատժվի». Գ.Սահակյան.

ԱԺ նախագահ Գալուստ Սահակյանն այսօր ԱԺ-ում լրագրողների հարցին, թե ինչպե՞ս է գնահատում ՀՀԿ-ական պատգամավոր Սեյրան Սարոյանի երեկվա պահվածքը, հարցադրում արեց. «Մարտադաշտո՞ւմ, թե՞ Ազգային ժողովում»:

ԳԱԼԱ-ի դիտարկմանը, որ խոսքը խորհրդարանում նրա պահվածքի մասին է, եւ որ հնարավոր է Սարոյանը Սերժ Սարգսյանի՝ ԱԺ-ն խրամատի հետ համեմատելն ուղիղ իմաստով է հասկացել, Գ.Սահակյանը նշեց, որ իր համար ցանկալի կլինի, որ խորհրդարանում վիճակը բարեկիրթ լինի, բայց բանավեճերն անկանխատեսելի են:

Հիշեցնենք, որ Սեյրան Սարոյանը երեկ բանավեճի էր բռնվել ընդդիմադիր պատգամավոր Զարուհի Փոստանջյանի հետ՝ հանդես գալով Սյունիքի մարզպետ Սուրիկ Խաչատրյանի և նրա ընտանիքի պաշտպանությամբ: Գալուստ Սահակյանն այսօր նշեց, որ եթե Զարուհի Փոստանջյանի հայտարարությունները հիմնավորված լինեին, դրա համար համապատասխան մարմիններ կան:

«Նորից այսօր Զարուհի Փոստանջյանն իր հայտարարության տեքստը շրջանառության մեջ է դրել, որն էթիկայի նորմերից դուրս է: Այսինքն՝ թվում է պատգամավորին, որ որևէ պատգամավոր կարող է որևէ մեկին կլասիկ հայհոյի, ու դա դնենք շրջանառության մեջ»,- ասաց նա:

Հարցին, թե ՀՀԿ-ն չի՞ մտածում Սուրիկ Խաչատրյանից ազատվելու մասին, Գալուստ Սահակյանը պատասխանեց, որ չպետք է մտածել որևէ մեկից ազատվելու մասին, պետք է մտածել այն մասին, որ նման դեպքեր չլինեն:

«Ես կարծում եմ հանցագործը պիտի պատժվի: Եթե դու լինես գլխավոր դատախազ, քննություն անես, բերես ու ցույց տաս, ես կհավատամ, որ հանցագործ է: Դու պարզապես էդպես ես մտածում, ասում ես՝ հանցագործ է»,- ասաց նա:

Գալուստ Սահակյանը լրագրողներին հարցադրում արեց, թե արդեն Սուրիկ Խաչատրյանի որդու մեղադրականը գրե՞լ են ու մտածում են, որ նա հանցագո՞րծ է: «Իրավաբանությունը լիրիկա չէ, զգացմունք չէ»,- ասաց նա: Լրատվամիջոցի դիտարկմանը, որ Սուրիկ Խաչատրյանն ու նրա ընտանիքը պարբերաբար հայտնվում են տարբեր հանցագործությունների կիզակետում, ինչո՞ւ են նրան ներում, եւ արդյո՞ք դա չի ծնում անպատժելիություն, ԱԺ նախագահը պատասխանեց. «Ուզում եք ասել, որ էնպիսի մի հանգամանք լինի, որ նման դեպքերի լիազոր մարմինը լինեն լրագրողնե՞րը, դատաիրավական համակարգ կա, գործում է այնքանով, ինչքանով գործում է»:  

մանրամասները` սկզբնաղբյուրում