ԵԹԵ ՌՈՒՍ ԽԱՂԱՂԱՊԱՀՆԵՐԸ ՉԼԻՆԵՆ, ՄԻ ՀԱՅ ՉԻ ԼԻՆԵԼՈՒ ԱՐՑԱԽՈՒՄ

Վերջին օրերին ազերիները վերստին ակտիվացել են: Ինչ է դա նշանակում, հնարավո՞ր է նոր պատերազմ: «Իրավունքի» հետ զրույցում, անդրադառնալով ադրբեջանցիների ակտիվացմանը, Արցախի արտաքին գործերի նախարար ԴԱՎԻԹ ԲԱԲԱՅԱՆԸ հետեւյալ մեկնաբանությունը տվեց.

- Ադրբեջանցիները հիմա հասկանում են, որ չեն կարող պատերազմով հարցը կարգավորել, որ լայնածավալ պատերազմը կբերի Ռուսաստանի հետ բախման: Նրանք հասկանում են, որ քանի դեռ ռուս խաղաղապահներն այնտեղ են, Արցախի անվտանգությունն ապահովված է: Հասկանում են, որ ինչքան կա Արցախը, նրանք Հարավային Կովկասում եւ ավելի մեծ տարածաշրջանում իրենց աշխարհաքաղաքական  նպատակներին չեն կարողանում հասնել` Հյուսիսային Կովկասի գրավում, Կենտրոնական Ասիա ներթափանցում, Իրանի մասնատում, Պովոլժիեի եւ հարակից շրջանների գրավում եւ այլն: Հիմա իրենց պետք է, որ ե՛ւ հայերը չլինեն, ե՛ւ ռուս-հայկական եղբայրությունը խարխլվի: Ի՞նչ պետք է անեն դրա համար. լայնածավալ գործողություն չեն կարող անել, ահաբեկչություն են անում: Նման կրակոցներով ուզում են մարդկանց վհատեցնեն, որ մարդիկ մտածեն` ապագա չկա, որ պետք է երեխաների համար դուրս գալ Արցախից, որ անվտանգ չէ: Երկրորդ` հարվածում են հայ-ռուսական եղբայրությանը, ասում են` տեսնո՞ւմ եք, ռուսներն այնտեղ են, բայց չեն իրականացնում իրենց առաքելությունը: Բայց եթե 2,5-3 կմ-ից ինքը կրակում է, դա ո՞նց է հնարավոր կանխել: Այսինքն, սա մտածված է, միշտ էլ լինելու է: Որքան էլ հզոր լինի ոստիկանական համակարգը, միշտ էլ ավազակներ ու հանցագործներ կան: Նույն վիճակն է, հանցագործների փիլիսոփայությունն է աշխատում:

- Պարոն Բաբայան, այնուամենայնիվ, ռուս խաղաղապահները որքանո՞վ են կարողանում արցախցիների անվտանգությունը պաշտպանել:

- Եթե ռուս խաղաղապահներն այստեղ չլինեն, մի հայ չի լինելու Արցախում, Ադրբեջանն անմիջապես հարձակվելու է: Այսպիսի շփման գիծ ունենալու պարագայում մենք ի վիճակի՞ ենք միայնակ պաշտպանելու Արցախը, թե՝ ոչ: Սա չի նշանակում, որ Արցախը որեւէ դերակատարություն չունի: Ընդհակառակը, մենք էլ ունենք կարեւորություն, մենք էլ պետք է հասկանանք` ինչ կարեւորություն ունենք, ինչ չունենք եւ այլն: Բայց պետք է լավ հասկանանք, որ այդ բոլոր գործընթացներն այնպես անենք, որ չշահարկվի այս ամենը: Մեր պետության, մեր ժողովրդի ճակատագիրն է որոշվում:

ԻԼՈՆԱ ԱԶԱՐՅԱՆ

Iravunk.com