ԵՏՄ անդամակցությամբ պանրագործների համար լավագույն ժամանակներ են սկսվում. մասնագետներ.

«Չանախ», «Լոռի», «Ռոկֆոր». պանրի այս տեսակները շատ հարգի են և պահանջված, և եթե մենք բոլորս պանիր արտադրենք՝ Ռուսաստանի պահանջարկը չենք բավարարի: Tert.am-ի հետ զրույցում ասաց «Հայրենական ապրանքարտադրողների միության» նախագահ Վազգեն Սաֆարյանը՝ պատասխանելով հարցին, թե Հայաստանի՝ Եվրասիական տնտեսական միությանն անդամակցումն ինչ հնարավորություններ ու խնդիրներ է առաջացնելու պանրագործների համար:

«Պանրագործների համար լավագույն ժամանակներ են սկսվում, և իրենք պետք է դա օգտագործեն: ԵՏՄ-ին անդամակցելուց հետո ավելի կմեծանա պանրի արտահանումը, որովհետև առանց ավելորդ քաշքշուկների, մաքսազերծումների, բնականաբար, ավելի հեշտացված կլինի այն»,- նշեց Վազգեն Սաֆարյանը:

Նրա համոզմամբ՝ Հայաստանից արտահանվող կաթնամթերքից, ենթադրաբար միայն պանիրը մեծ պահանջարկ կունենա ԵՏՄ շուկայում, իսկ մյուս մթերքների պարագայում՝ թթվասեր, մածուն և այլն բելառուսական արտադրանքն ավելի լայն հնարավորություն կունենա իրացվելու:

Հարցին, թե Հայաստանում պանրի դեֆիցիտ չի լինի, Վազգեն Սաֆարյանը պատասխանեց, թե ինքն այդպես չի կարծում. «Բայց հակամենաշնորհային հանձնաժողովը պետք է վերահսկի ամեն ինչ: Ժամանակն է, որ Հայաստանում ունենանք գնագոյացման ինչ-որ մի վարչություն, որը հաշվարկներ անի, թե որ ապրանքն ինչ գին պետք է ունենա: Իսկ այստեղ ամեն մեկը գին է դնում իր ապրանքին: Դրա համար այդ խնդիրը պետք է ինչ-որ ձևով լուծվի, որևէ մեկը գնագոյացմամբ չի զբաղվում»:

մանրամասները՝ սկզբնաղբյուրում