Գագիկ Ծառուկյանի թիկնազորի պետն է եղել, թե ում թիկնազորի պետն է եղել, չեմ կարող ասել...

Fnews.am-ը արդեն իսկ անդրադարձել էր այն մասին, որ մայիսի 18-ին Աբովյան քաղաքի առեւտրականները բողոքի ցույց էին կազմակերպել՝ ընդդեմ Գ. Ծառուկյանին պատկանող «Առինջ մոլ» առեւտրի կենտրոնի: Առեւտրականները դժգոհել էին, որ կենտրոնի գործունեությունից հետո իրենց աշխատանքն անարդյունավետ է դարձել, եւ  որ առեւտուրը կարելի է ասել զրոյական մակարդակի վրա է հասել: 
Խոսք էր գնացել նաեւ այն մասին, որ Գագիկ Ծառուկյանի թիկնազորը հավաքել էր բողոքի ակցիայի մասնակիցներին բռնի ուժով տարել դեպի Առինջ գյուղ՝ Գագիկ Ծառուկյանի մոտ: Իսկ ահա Աբովյան քաղաքի հեռուստաընկերության լրագրողներին էլ հարվածել , քաշքշել էին, խփել տեսախցիկներին`խոչընդոտելով լրագրողի աշխատանքը:

Կատարվածի առնչությամբ,   Fnews.am-ը  փորձեց մեկնաբանություն ստանալ նախ  ՀՀ ոստիկանության լրատվության եւ հասարակայնության հետ կապերի բաժնից, որտեղից էլ մեզ փոխանցեցին, որ իրականում այո, Աբովյան հեռուստաընկերության գործադիր տնօրենը հաղորդում է ներկայացրել ոստիկանության Կոտայքի բաժին, եւ որ այդ կապակցությամբ հաղորդումն ընդունվել է ոստիկանության Կոտայքի բաժնում, կատարվում է հետաքննություն, որպեսզի ճշտվեն բոլոր հանգամանքները:

Մինչդեռ, որքան էլ որ զարմանալի է Գագիկ Ծառուկյանի մամլո խոսնակ Իվետա Տոնոյանը, Fnews.am-ի հետ զրույցում նկատեց, թե. «Ես այս թեմայով այսօր խոսել եմ թվով 100 մարդու հետ, ովքեր անգամ չեն տեսել լրագրողների : Առևտրականները խնդրել էին Էդիկ Բաբայանին հանդիպում կազմակերպել Գագիկ Ծառուկյանի հետ, նա էլ կազմակերպել է , բայց բռնություն չի եղել, ես Կենտրոն հեռուստաընկերությամբ քիչ առաջ նայում էի բոքողի ակցիան , ոչինչ չտեսա , բայց փաստորեն լրագրողները դիմել են ոստիկանություն, դե թող գործը պարզվի» :

Աբովյան հեռուստաընկերության տնօրեն Ազնիվ Չիզմեչյանն էլ մեզ հետ զրույցում  պատասխանելով այն հարցին, թե   իրականում ի՞նչ է կատարվել այսօր Աբովյանում. արդյո՞ք իրենց լրագրողներին Գ. Ծառուկյանի թիկնազորի պետ հայտնի Էդոյի գլխավորությամբ քաշքշել են, կոտրել տեսախցիկները , խանգարել նկարահանել բողոքի ակցիան ՝ պատասխանեց. «Մենք տեղեկացանք, որ Աբովանում առևտրականները բողոքի ակցիա են կազմակերպել և լրագրղները գնացին լուսաբանելու: Բայց նկարահանման պահին օպերատորին մոտեցել են երկու թիկնեղ տղաներ և ասել, որ անջատեն տեսախցիկները: Մեջբերեմ ՝ մենք թողել ե՞նք, որ նկարում եք : Իսկ ինչ վերաբերվում է ու՞մ գլխավորությամբ է եղել՝ Գ. Ծառուկյանի թիկնազորի պետն է եղել, թե ում թիկնազորի պետն է եղել, չեմ կարող ասել»:

Մեր հարցին ՝ արդյո՞ք լրագրողները չեն հասցրել ֆիքսել հարվածողներին, Աբովյան ՀԸ-ի տնօրենն ասաց. «Չեն հասցրել ֆիքսել: Ինձ տեղեկացրեցին , որ նման բան է եղել, ես էլ ասացի որ չշարունակեն, այնուհետև օպերատորի հետ միասինգնացինք ոստիկանություն և ես հաղորդագրություն տվեցի կատարվածի վերաբերյալ: Նման դեպք էլի է եղել, սակայն ձայն չենք հանել, բայց այս անգամ որոշեցինք չլռել, քանի որ առջևում նախընտրական եռուզեռն է և նման դեպքերը չեն բացառվում»:

Հուսանք, որ Աբովյանի քաղաքապետի ընտրություններում գործը ձեռնամարտի չի հասնի
Եւ որ նախընտրական շրջանն էլ, բազում անակնկալներ չի մատուցի բոլորիս` բլեֆների, ու քաղաքական հնարքների տեսքով, ինչի ականտեսը ցավոք սրտի դարձել ենք բազում անգամներ:

Աննա  Առաքելյան