Գագիկ Խաչատրյանը՝ Ծառուկյանի բիզնեսների ստուգումների մասին

Այսօր ԱԺ-ում բյուջեի կատարողականի քննարկումներին ներկա էր նաեւ  ՀՀ ֆինանսների նախարար Գագիկ Խաչատրյանը:
Լրագրողները նախարարից հետաքրքրվեցին, թե ի՞նչ արդյունք ունեցան Գագիկ Ծառուկյանի բիզնես գործունեության ոլորտում հարկային մարմինների իրականացրած գործողությունները:
Ի պատասխան նախարարն ասաց, որ առաջիկայում պատրաստվում են ստուգումների արդյունքները ներկայացնել վարչապետին, որից հետո էլ կհրապարակվեն արդյունքները:
Լրագրողների այն հարցին` արդյո՞ք Սերժ Սարգսյանի մտավախությունները Գագիկ Ծառուկյանի հարկային պարտավորությունների վերաբերյալ համապատասխանում են իրականությանը, Գագիկ Խաչատրյանը պատասխանեց.
«Երբ որ կլինեն տվյալները, կհրապարակվեն, հետո ենթադրությունները կանեք: Ինչո՞ւ եք շտապում: Երբ կլինեն տվյալները, հետո ինչ ենթադրություններ կուզեք, կանեք»:
Հարցին, թե հնարավո՞ր է, որ ստուգումները կանգ կառնեն, նա պատասխանեց, որ երբեք հարկային ստուգումները չեն կարող կանգնեցվել: «Այս տարիների ընթացքում երբևիցե նկատած չեք լինի, որ հարկային մարմինը որևիցե ավելորդ կամ պակաս վերլուծություն անի: Լինի քաղաքական գործիչ, պետական պաշտոնյա` կապ չունի»,- ասաց Խաչատրյանը: