Գարեգին Բ-ն` HSBC-ում պահվող իր միլիոնների մասին.VIDEO

Համամիտ չեմ նման գնահատականի հետ, որ հոգևոր առաջնորդները ցոփ ու շվայտ կյանքով են ապրում...

«Համամիտ չեմ նման գնահատականի հետ, որ հոգևոր առաջնորդները ցոփ ու շվայտ կյանքով են ապրում: Կարծում ենք, որ դա ավելի շատ շահարկում է, քան իրականության հետ որևիցե առնչություն ունի: Իսկ եթե նման պարագաներ կան, անշուշտ, մեր կողմից անհրաժեշտ ցուցումները և առաջնորդությունը տրվում է»,-այսօր Եռաբլուր ռազմական պանթեոնում ասաց Ամենայն հայոց կաթողիկոս Գարեգին Երկրորդը:

Այն հարցին, թե իշխանավորները չե՞ն հեռացել եկեղեցուց, թեև եկեղեցի են կառուցում, Գարեգին Բ-ն պատասխանեց. «Մենք չենք կարող նման գնահատական հնչեցնել, որովհետև մենք որևէ անձի հոգու, ապրումի քննողը չենք: Մենք փառք ենք տալիս, որ եկեղեցի են այցելում, աղոթք են բարձրացնում: Մենք խրախուսում ենք եկեղեցաշինությունը»:
Ինչ վերաբերում է HSBC բանկում իր անունով բացված հաշվեհանարին՝ Գարեգին Բ-ն ասաց. «HSBC բանկում եղել է մի գումար, որը նվիրատվություն է եղել բարերարի կողմից երջանկահիշատակ մեր նախորդին: Նախորդի վախճանումից հետո այդ հաշիվը փոխակերպվել է մեր անունով»:
Հիշեցնենք, որ Հետաքննող լրագրողների միջազգային ընկերակցությունը նախորդ տարի գաղտնազերծել էր մի շարք տեղեկություններ, որոնց համաձայն, Ամենայն Հայոց կաթողիկոս Գարեգին Բ-ն գաղտնի հաշվեհամար է ունեցել: Ըստ այդ տեղեկատվության, Գարեգին Բ-ն HSBC բանկի շվեյցարական մասնաճյուղում ունի բանկային հաշիվ, որի վրա կա 1 միլիոն 100 հազար դոլար: