Գազն էժանացել է, բենզինը` ոչ. ՏՄՊՊՀ-ն ներկայացրել է այսօրվա գները

Փաստինֆոն գրում է. ՀՀ ՏՄՊՊՀ նախագահ Արտակ Շաբոյանը ՀՀ վարչապետ Հովիկ Աբրահամյանին է ներկայացրել խանութներում մի շարք ապրանքատեսակների իրացման գների և Երեւանի բենզալցակայաններում` բենզինի ու գազալցակայաններում՝ գազի իրացման գների դիտանցման մասին հերթական տեղեկանքը` այսօրվա գներով:

Նշենք, որ այդ տեղեկանքի համաձայն, երեկվա համեմատ երևանյան խանութներում ՏՄՊՊՀ վերահսկողության ոլորտում գտնվող, գերիշխող դիրք գրավող խոշոր տնտեսվարողների վաճառած ապրանքների գները փոփոխություն չեն կրել. 1կգ շաքարավազը, ըստ ՏՄՊՊՀ աշխատակիցների արձանագրած գների, վաճառվում է 269 դրամով, թթվասերը` 250-260, կարագը` 2600-3060, պանիրը` 2450- 2590, մածունը` 260-300, կաթնաշոռը` 410-450, ձուն` 68-77, ձեթը` 770-780 դրամով: Իսկ ալյուրի մեծածախ գինը, Արտակ Շաբոյանի ներկայացրած տեղեկանքի համաձայն, 269- 274 դրամ է:

Ինչ վերաբերում է բենզինին, ապա դրա գինը, ըստ նույն տեղեկանքի, դեկտեմբերի 17-ից հետո փոփոխություն չի կրել, թեև դոլարի փոխարժեքը դրանից հետո բավականին նվազել է: Այն երևանյան բենզալցակայաններում շարունակում է վաճառվել 1 լիտրը 470 դրամով: Իսկ գազի գինը նվազել է. եթե դեկտեմբերի 16-17-ին 1 խմ գազը գազալցակայաններում վաճառվում էր 230 դրամով, դեկտեմբերի 18-ին` 210, ապա դեկտեմբերի 24-ին ու 25-ին ՏՄՊՊՀ աշխատակիցներն արձանագրել են 200 դրամ արժեքը:

Հիշեցնենք, այսօր կառավարության նիստի ավարտին, լրագրողների հետ ճեպազրույցում ՏՄՊՊՀ նախագահ Արտակ Շաբոյանը հայտարարել էր, որ բենզինը Հայաստանում չի էժանանում, քանի որ թանկ գնով ներկրվում է ՌԴ-ից: