Գեներալ Մանվելը փակել չի տվել Դուբայը. Առևտրի կենտրոնի տնօրեն

Մամուլում ակտիվ լուրերի էին շրջանառվում  այն մասին, որ Էջմիածին քաղաքի «Դուբայ» առևտրի կենտրոնը փակվել է գեներալ Մանվել Գրիգորյանի հրամանով: 
Էջմիածնում բոլորը ` մեծից փոքր լավ գիտեն, որ եթե գեներալը մի բան ուզում է, ուրեմն պիտի լինի ու դա քննարկման ենթակա չէ: 

«Անգամ եթե մեքենան մի քանի րոպեով մի տեղ հենց կանգնեցնում ենք, մեկ էլ մի տեղից մի վախեցած դեմքով պահակ գալիս ասում է , տարեք մեքենան, գեներալը կտեսնի ու խիստ կջղայնանա» ,- Fnews.am- ի հետ զրույցում  նշեց Էջմիածին քաղաքի բնակիչներից մեկը:  

Մեզ հասած տեղեկությունների  համաձայն `  «Դուբայ»  առևտրի կենտրոնը Էջմիածնում բարի համբավ ունի և հաճախորդները սիրով են օգտվում այդ մարկետից, դե բնականաբար, եկամուտն էլ անհաշվելի է : Երեւի հենց սա է պատճառը, որ գեներալը  «փակել  է  տվել»  կենտրոնը: Չէ որ իրեն պատկանող  «Ունիվերմակ»-ի և   «Լեժանկա»-ի  -ի գործերը կարող էին կտրուկ վատանալ:  Նշենք նաև, որ Էջմիածնում 2 Դուբայ կա ` Մեծ և Փոքր տաղավարներով: Մեծ տաղավարում կա և' հագուստ, և' տնտեսական ապրանքներ, և' մթերք: 

Գեներալ Մանվելն արդեն տվել է իր մեկնաբանությունն այս մասին, որում նշել  է , որ անգամ չի լսել նման առևտրի կենտրոնի մասին: Սակայն Էջմիածնի տերն ու տիրականը դժվար թե չիմանար իր տարածքում ինչ կա, չկա...

Fnews.am-ը կապ հաստատեց Դուբայ առևտրի կենտրոնի տնօրեն Գրիգոր Դանիելյանի հետ , ով հարցին, թե արդյո՞ք փակվել է առևտրի կենտրոնը և ի՞նչն է պատճառը հարցին տվեց հետևյան պատասխանը. «Ոչ, մեր առևտրի կենտրոնը չի փակվել, մենք հենց հիմա էլ աշխատում ենք, պարզապես 5-6 օր չենք աշխատել, հավանաբար թյուր կարծիք է ստեղծվել, թե այլևս չի բացվելու» :

Հարցին, թե ո՞րն էր վեցօրյա դադարի պատճառը, տնօրենը նշեց. «Մենք հաշվարկների մեջ էինք , բայց հիմա խանութը բաց է» :

«Գեներալ Մանվելի հետ մենք բավականին լավ հարաբերությունների մեջ ենք և նման բան լինել չէր կարող » ,- ամփոփեց կենտրոնի տնօրեն Գրիգոր Դանիելյանը: 

Ինչեւէ, մնում է հուսալ, որ  այս դեպքում  «ԱՌԱՆՑ ԿՐԱԿ, ԾՈՒԽ ` ԴՈՒՐՍ ԵԿԵԼ» ...

Կապրենք`կտեսնենք...

Աննա   Առաքելյան 

Նյութի հեղինակ ` Աննա Առաքելյան