Գեներալը քինախնդիր չէ.գեներալ Մանվել-Դոն Պիպո հակամարտություն չկա ՞

Օրերս Էջմիածնում տեղի ունեցած թեժ իրադարձությունների, դրան հաջորդող զարգացումների, ու Էջմիածնում տիրող տրամադրությունների շուրջ, Fnews.am-ը զրուցեց նաեւ ՀՀ ԱԺ ՀՀԿ խմբակցության պատգամավոր, գեներալ Մանվել Գրիգորյանի մամուլի խոսնակ Վարդան Վարդանյանի հետ.
-Ինչ եք կարծում, ի՞նչով կավարտվի օրեր առաջ Էջմիածնւմ հնչած կրակոցների անհասկանալի պատմությունը:
-Եթե մամուլի հրապարակումներից ելնենք, հստակ երեւում է, որ կոնկրետ դեպքում գեներալի մտերիմը ո՛չ միջադեպի հրահրող կողմն է եղել, ո՛չ նախաձեռնողը, եւ ո՛չ էլ կրակողը: Գեներալը` թոռների, հարազատների, զարմիկների, երեխաների դաստիարակության հարցում շատ խիստ է: Նա անընդհատ հորդորում է, որ նրանք ավելի համեստ լինեն, քան որեւէ մեկ այլ քաղաքացի հասարակության մեջ, եւ նրանք դա ընկալում, ընդունում եւ այդպես էլ վարվում են: Ես բացառում եմ, որ գեներալի զարմիկի մոտ զենք եղած լինի, որ նա կարող էր հոռիություն անել, հրահրող լինել: Բարեբախտաբար գեներալի զարմիկի ընկերը հետն է եղել ու կանխել է միջադեպը, որի պատճառով էլ վիրավորվել է:
-Մինչ օրս էլ տարբեր շրջանակներում խոսակցություններ են պտտվում այն մասին, որ կրակոցներից հետո Դոն Պիպոյի մտերիմներից մեկի կնոջն են առեւանգել:Դրա հետ կապված ի՞նչ կասեք:
-Նման բան տեղի չի ունեցել.նախ գեներալը քինախնդիր չէ, եւ հետո մենք ավելի լուրջ խնդիրներ ունենք այսօր երկրում: Մենք իրավունք չունենք այդ ամենն անողներին որոնել, եւ ոչ էլ ինքնադատաստանի ենթարկել, ապրում ենք իրավական պետության մեջ: Դա իրավապահների գործն է: Երբ ես տեղյակ պահեցի գեներալին, որ այդ միջադեպը նման հասարակական հնչեղություն է ստացել եւ որոշ հարցադրումներ ներկայացրեցի, որոնք ինձ էին ուղղում, նա ինձ պատասխանեց. «Ախր լուրջ հարցեր կան, նորից երկու զոհ ենք ունեցել մեր սահմանին, այս ամենը թողած, ես ի՞նչ ասեմ: Ինչ-որ մեկը ախմախ է եղել, ես էլ հո դրանց խելքին չե՞մ»: Ինչ վերաբերում է առեւանգմանն՝ ասեմ, որ այդ մարդկանց փնտրելու իրավունքն անգամ մենք չունենք, որովհետեւ ՀՀ օրենսդրությամբ դա մեր խնդիրը չէ, իսկ մենք օրինապաշտ մարդիկ ենք:
-Իսկ արդյո՞ք Ձեզ հետաքրքիր չէ, թե ո՞վ է վազանց կատարել, մեքենան կանգնեցրել ու փաստորեն զենք օգտագործել:
-Մենք մեր վարկածներն առաջ քաշելու փոխարեն, լավ կլինի թույլ տանք, որ պրոֆեսիոնալներն աշխատեն:
-Հետաքրքրվե՞լ եք արդյոք Դոն Պիպոյի շրջապատի մարդիկ են այդ քայլին դիմել, թե՞ ոչ:
-Չենք հետաքրքրվել, որովհետեւ «Երկրապահը» լուրջ խնդիրներ ունի, ծրագրեր ունենք, որոնք պետք է կյանքի կոչենք. ուխտագնացություններ եւ այլն: Չգիտենք, թե ովքեր են եղել: Ինչ վերաբերում է նրան , որ իբրեւ վաղեմի թշնամություն կա Դոն Պիպոյի եւ գեներալի միջեւ, ասեմ, որ գեներալը բազում առիթներով ասել է, որ ինքը հայերի մեջ թշնամիներ չունի: Չկա աշխարհում որեւէ հայ, որն իր թշնամին է, մեր թշնամին` թուրքն է: Իր զարմիկները զենք կիրառում են հայրենիքի պաշտպանության համար: Նույնիսկ իր որդին 13 տարեկանից առաջին գծում է եղել:
-Եթե թշնամություն չկա, ապա գեներալն ինչո՞ւ վրդովվեց, երբ Դոն Պիպոյի անունը հնչեցրեցինք. նա ասաց.«Ի՞նչ Դոն Պիպո, թող ինքը ինձ ճանաչի, ի՞նչ է սա նշանակում»: Այսինքն մեկը մյուսին ճանաչելու խնդիր կա՞:
-Եթե գեներալը նման բան է ասել, ուրեմն ճիշտ է ասել, որովհետեւ նա Արցախյան պատերազմի իսկական հերոս է, իր աշխատանքը նաեւ ժողովուրդն է տեսել ու գնահատել: Մենք այս ազատամարտում մասնակցություն ունեցած բոլոր անձանց պարտավոր ենք հարգել ու ճանաչել:
-Արդյո՞ք այս դեպքից հետո Էջմիածնում լարվածության նոր ֆոն չի ստեղծվի:
-Գեներալն ամեն ինչ անում է, որ հայ հասարակության մեջ, հայակական խմբավորումների միջեւ երբեք թշնամություն չլինի, նա քինախնդիր չէ: Ամեն ինչ անում է մթնոլորտը թուլացնելու համար:

Սոսե  Չանդոյան