Գերմանիան մտադիր է հեշտացնել որակյալ միգրանտների ընդունումը

Գերմանիայի կառավարությունը միգրացիոն օրենք է մշակում, որը կհեշտացնի որակյալ մասնագետների մուտքը երկիր։ Այս մասին ասել է Գերմանիայի աշխատանքի նախարար Հուբերտուս Հայլը (Hubertus Heil) Bild am Sonntag թերթի հարցազրույցում։

«Մենք կմտցնենք «հնարավորությունների քարտեզ»՝ բալերի թափանցիկ համակարգով, որպեսզի մարդկանց համար, որոնց կարիքը մեր երկիրն ունի, ավելի հեշտ լինի գալ մեզ մոտ»,- խոստացել է Հայլը՝ բացատրելով օրինագծի իմաստը, որը, ինչպես սպասվում է, կներկայացվի այս աշնանը։

Քաղաքական գործիչները հույս ունեն, որ նոր համակարգը արտասահմանում գտնվող մասնագետների համար կհեշտացնի աշխատանքի որոնումը Գերմանիայում։ Գերմանիայի աշխատանքի նախարարի խոսքով՝ երկրում ամեն տարի կփորձեն պարզել, թե որքան մարդ կարող է գալ երկիր «հնարավորությունների քարտեզով», որպեսզի որոշակի ժամանակի ընթացքում այստեղ աշխատանք փնտրեն կամ տեղ՝ պրոֆեսիոնալ կրթություն ստանալու համար։ Գերմանիայում գտնվելու ծախսերն այդ ժամկետի ընթացքում, սակայն, հոգալու է թեկնածուն ինքը։

Գերմանիայում ընդունվող դիպլոմով կամ մասնագիտական կրթության վկայականով մասնագետները ինքնըստինքյան հայտնվում են այն խմբում, որոնք կարող են «հնարավորությունների քարտեզ» ստանալ, բայց մյուս թեկնածուները եւս Գերմանիա գալու շանս ունեն, ասել է Հայլը։

Բալերը հաշվվելու են չորս չափորոշիչներով՝ կրթության մասին արտասահմանյան վկայական, առնվազն երեք տարվա աշխատանքի փորձ, լեզվի իմացություն կամ նախկինում Գերմանիայում ապրելը, ինչպես նաեւ տարիքը՝ մինչեւ 35 տարեկան։ «Հնարավորությունների քարտեզն» ստանալու համար բավական է կատարել չորս չափորոշիչներից երեքը։ Ներկա պահին ծրագին մասնակցության ավելի մանրամասն պայմանները քննարկվում են Գերմանիայի կառավարության կողմից, տեղեկացրել է «Немецкая волна»-ն։

Այսօր Գերմանիան պայքարում է կադրերի էական անբավարարության հետ այնպիսի ոլորտներում, որոնք պահանջում են միջին մասնագիտական կրթություն։ Գերմանական արհեստագործական մասնագիտությունների կենտրոնական միավորման (Zentralverband des Deutschen Handwerks) տվյալներով՝ այս ոլորտում այժմ 250 000 թափուր տեղ կա։