Ժիրայր Սեֆիլյանը չի ցանկանում մասնակցել շոուներին. փաստաբան

«Թե լրագրողը, թե հաղորդաշարի հեղինակը, թե ընդհանրապես հեռուստաընկերությունը
միջոցներ չեն ձեռնարկել կապ հաստատելու Ժիրայր Սեֆիլյանի հետ։ Բացի այդ, հաղորդման ընթացքում խոսողների դրվագները հաղորդաշարի հեղինակը կապում և ուղղորդում է ուրիշ ուղղությամբ».-նշում է փաստաբան Տիգրան Հայրապետյանը։

Դեկտեմբրի 14-ին Աջափնյակ և Դավթաշեն ընդհանուր իրավասության դատարանում շարունակվելու է Ժիրայր Սեֆիլյանի հայցի քննումն ընդդեմ «Արմենիա» հեռուստատեսության։ Հիշեցնենք, որ «Արմենիա» հեռուստաընկերության «Սուր անկյուն» հաղորդաշարի 12-ի թողարկման «Հաղթանակը շատ հայրեր ունի» տեսանյութի
հրապարակումից հետո ազատամարտիկ, «Հիմնադիր խորհրդարանի» հիմնադիր Ժիրայր Սեֆիլյանը դատի էր տվել հեռուստաընկերությանը զրպարտության և վիրավորանքի միջոցով պատվին, արժանապատվությանը և բարի համբավին հասցված վնասի հատուցման պահանջով։

Ժիրայր Սեֆիլյանի փաստաբան Տիգրան Հայրապետյանը տեղեկացրեց, որ «Սուր անկյուն» հաղորդաշարի հեղինակը և այդ հաղորդումը պատրաստող լրագրողը դատական նիստերին չեն ներկայանում։ «Երեք պատասխանողներ էին, միայն «Արմենիա թի-վին» է ներկայանում, մյուս երկու պատասխանողները չեն ներկայանում և խնդրել են գործը քննել իրենց բացակայությամբ։ «Արմենիա թի-վիի» ներկայացուցչի դիրքորոշումը հետևյալն է, որ իրենք ուղղակի տեղեկատվությունը լսել են ինչ-որ անձանցից և այդ տեղեկատվությունն ուղղակի փոխանցել են հեռուստատեսությամբ, իրենք որևէ ձևով չեն փորձել ուղղորդել, փաստերը որևէ ձևով չեն փորձել կիսատ ներկայացնել և դրանով  տպավորություն ստեղծել, այլ՝ ուղղակի լրագրողը փոխանցել է այն, ինչ-որ իրենց ասել են։ Մինչդեռ ակնհայտ է, որ մի քանի հարցերի մինչև այս պահը չի անդրադառնում «Արմենիա թի-վի»-ի ներկայացուցիչը, եթե ամբողջ հաղորդումը Ժիրայր Սեֆիլյանի մասին է, ամենանորմալ ճանապարհը նաև Ժիրայր Սեֆիլյանից այդ փաստերի վերաբերյալ հարցնելն էր, այսինքն՝ հարցազրույց վերցնելն էր։  Թե լրագրողների մասին օրենքում, թե քաղաքացիական օրենսգրքում նշված է, որ լրագրողն ամեն ինչ պետք է անի, որպեսզի լրատվության փաստը, հանգամանքը բացահայտելու համար, եթե ինքն ամեն ինչ արել է, բայց չի կարողացել բազմակողմանի բացահայտել, նոր կարող է այդ փաստը ինչ-որ մեկի ասածով տեղադրել».- նշում է փաստաբանն ու պնդում, որ հաղորդման հեղինակները ոչ մի կերպ չեն փորձել Ժիրայր Սեֆիլյանի հետ կապ հաստատել։

«Անգամ հեռախոսով չեն զանգել, էլ չեմ ասում, որ Ժիրայր Սեֆիլյանն
ունի գործունեության վայր, ինքը «Հիմնադիր խորհրդարանի» հետ է կապված եղել, հետո մի քանի այլ հասարակական կազմակերպությունների հետ է կապված եղել, իր նստավայրը պարզ է եղել, լրագրողների համար որևէ խնդիր չի եղել։ Բացի այդ, երբ նայում ենք այդ լրատվությունը, տեսնում ենք, որ հիմնականում խոսում է հաղորդման հեղինակը ու դրվագներ են ցույց տալիս բանախոսներից, այդ խոսողների դրվագներում, եթե ուշադիր ենք նայում, խոսողները որևէ բացասական բան չեն ասում նրա մասին»։

Տիգրան Հայրապետյանի տեղեկացմամբ` Ժիրայր Սեֆիլյանն ինքը չի ցանկացել
մասնակցել դատերին. «Ժիրայր Սեֆիլյանն ինքը չի ցանկանում մասնակցել, ներկայացուցիչ ունի, ինքն ընդհանրապես չի փորձում այդ շոուներին մասնակցել»։

Հիշեցնենք, որ Ժիրայր Սեֆիլյանն այս պահին գտնվում է անազատության
մեջ, Ժիրայր Սեֆիլյանին մեղադրանք էր առաջադրվել մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը զավթելու մեջ, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը եւ տարբեր վայրերում դրանք ապօրինի կերպով պահելը:

http://hraparak.am/?p=131895&l=am/girayr+sefilyany+chi+cankanum+masnakcel+shounerin+pastaban