Գիտեք,ես դրան կհավատամ այն օրը, երբ Հ.Աբրահամյանը հայտարարի...

Ներքաղաքական վերջին զարգացումների, ներկայիս վարչապետի եւ կառավարության ծրագրերի, ինչպես նաեւ քառյակ ուժերի, այսպես կոչված, համագործակցության հեռանկարների շուրջ fnews.am-ը զրուցեց, ՀԱԿ վարչության անդամ Զոյա Թադեւոսյանի հետ.
-Տիկին Թադեւոսյան, նախ եւ առաջ կուզենայի իմանալ, թե ի՞նչ կարծիք ունեք ներկայիս խորհրդարանի եւ պատգամավորների վարքաբանության ու գործունեության հետ կապված:
-Մի օր, երբ քվեարկում էին կառավարության ծրագիրը, դատելով ՀՀԿ պատգամավորների ինտելեկտից հասկացա, որ ինչ վնասաբեր ծրագիր էլ ներկայացնեին, նրանք առանց հասկանալու կողմ էին քվեարկելու: Դրա համար որեւէ վերաբերմունք չունեմ նրանց նկատմամբ: Անտարբեր եմ, պարզապես ցավում եմ մյուս պատգամավորների համար, ովքեր ստիպված են աշխատել նման մթնոլորտում: Ընդհանրապես ցավում եմ հայ ազգի համար, որ այդպիսի Ազգային ժողով ունի:
-Փաստորեն իշխող կուսակցության շարքերում ինտելեկտի խիստ պակա՞ս է նկատվում:
-Ինտելե՞կտ: Ես կասեմ, որ անգամ դաստիարակության պակաս ունեն պատկառելի տարիքի մարդիկ, նրանք չգիտեն ինչպես պահեն իրենց Ազգային ժողովում, ինչպես արտահայտվեն, չհայհոյեն, արբած չգան: Հասկանում եք, բաներ կան, որոնք չպետք է այդպես լինեն: Գուցե այլ երկրների Ազգային ժողովներում էլ նման բաներ կան չգիտեմ, տեղյակ չեմ, նման վարքագծի կանոններով շարժվող պատգամավորներ ունեն այլ պետությունները, թե՝ ոչ: Ես չէի ցանկանա մեր պատգամավորներին նման վարքագծով տեսնել, քանի որ Հայաստանի Հանրապետությունը շատ փոքր է, մարդիկ իրար լավ են ճանաչում: Մեկը մյուսին բարեկամ եւ ընկեր է, եւ դա անպատվաբեր արարք է, երբ մարդ իրեն պահել չգիտի օրենսդիր բարձրագույն մարմնում:
-Խորհրդարանում քչից շատից ակտիվություն դրսեւորող քառյակի հետագա ճագատագիրն ինչպե՞ս եք տեսնում:
-Քառյակի ճակատագիրը կախված է նրանց դիրքորոշումից եւ հաստատակամությունից, իրենց առջեւ դրած նպատակներից եւ դրանց հասնելու վճռականությունից: Ժամանակն ամեն ինչ ցույց կտա: Ես չեմ կարող գուշակել: Ցանականում եմ, որ նպատակասլաց լինեն, որովհետեւ հայրենիքի փրկության այլ ճանապարհ գոյություն չունի: Մեզ միայն միասնականությունը կփրկի, դա կտա հնարավորություն լուծելու համար այն խնդիրները, որոնք այսօր շատ սուր կանգնած են մեր պետության առաջ:
-Արդյո՞ք ԱԺ վերջին նիստին կառավարության ծրագիրը շատ փափուկ ձեւով չընդունվեց...
-Ընդդիմադիր ուժերը որոշում կայացրեցին չքեվարկել, իսկ թե ինչպես քվեարկեցին մեծամասնության պատգամավորները տեսանք բոլորս՝ մեկը մյուսի փոխարեն եւ այլն: Եվ վերջին հաշվով այնտեղ հրամանով քեվարկողներ են, փափուկ էլ պետք է ընդունվեր, ոչ ոք չէր կասկածում:
-Ինչպե՞ս եք վերաբերվում այն կարծիքներին, որ Հովիկ Աբրահամյանը դեպի նախագահական ընտրություններ է գնում:
-Գիտեք,ես դրան կհավատամ այն օրը, երբ դրա մասին ինքը կհայտարարի:
-Քաղաքական կուլիսներում խոսակցություններ են պտտվում, որ տվյալ թեմայի շուրջ լուրջ խմորումներ են գնում ընդդիմադիր դաշտում: Ասում են հակադիր կարծիքներնն ու վերաբերմունքը շատ են:
-Գիտեք կարծիքների բազմազանությունը միշտ էլ շատ լավ է: Ցանկացած հարցի շուրջ քննարկումները տալիս են արդյունք: Ես տեղյակ չեմ՝ կան արդյոք նման հակասություններ, թե, ոչ: Ես որեւէ մեկի հետ այդ կապակցությամբ կարծիք չեմ կիսում՝ ժամանակի սղության պատճառով: Թող կարծիքները շատ լինեն, չարամիտ մարդիկ՝ քիչ:

Զրույցը` Սոսե Չանդոյանի