Գնացել է տուն, վերցրել հրացանը ու եկել Դերոենց նստած տեղը` մեքենայի միջից կրակել ուղիղ կոկորդին...

Թե ինչն էր Տավուշի մարզի Մովսես գյուղում Բերդի տարածաշրջանի զինկոմ Դերենիկ Պապյանի սպանության պատճառը, Fnews.am-ին  որոշակի  մանրամասներ ներկայացրեց սպանվողի  բարեկամներից մեկը, ով չցանկացավ հրապարակել իր անունը: 

Սպանվածի հարազատի խոսքով վեճը առաջացել է սովորական կենցաղային հարցից, մասնավորապես."Դերոն նստած է եղել գյուղացիների հետ դրսում, Արթուրը մեքենայով մի քանի անգամ ճռռացնելով անցել է: Դերոն սկզբում ոչինչ չի ասել, հետո` տեսնելով, որ շարունակվում է ասել է. "Տղա ջան կարգին քշի, մարդ ենք` նստած խոսում ենք": Վերջինս սկսել է հայհոյել, թե ինքը ոնց ուզում՝ էնպես էլ քշում է: Դերոն էլ վեր է կացել մի ապտակ հասցրել, էս էլ, թե դե սպասի տես... Գնացել է տուն, վերցրել հրացանը ու եկել Դերոենց նստած տեղը` մեքենայի միջից կրակել ուղիղ կոկորդին: Էս էր էս ողբերգության պատճառը, էդ սպանողն էլ իր զինվորներից է եղել":
Հիշեցնենք, որ  սեպտեմբերի 18-ին ժամը 21:00-22:00-ն ընկած ժամանակահատվածում, Տավուշի մարզի Մովսես գյուղում վիճաբանության ժամանակ, 41-ամյա Արթուր Մկրտումյանն իր 16 մմ տրամաչափի երկփողանի որսորդական ողորկափող հրացանով կրակել է Դերենիկ Պապյանի պարանոցին, ինչի հետեւանքով վերջինս մահացել է:

Արթուր Մկրտումյանին մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Նա կալանավորվել է:

Նոնա Ադամյան