Գնաճի այլ պատճառներ

Shabat.am-ը գրում է.Արտագաղթը Հայաստանում ահագնանում է օրեցօր, դա բոլորս գիտենք: Արտագաղթն արտագաղթ, բայց դրան զուգահեռ մեկ այլ գործընթաց է գնում, որն ավելի վտանգավոր է: Արտագաղթից առավել վտանգավոր է ներքին միգրացիան կամ գյուղից քաղաք տեղափոխությունը: Այսպես ասած, մարդիկ սահմաններից հեռանում են դեպի Հայաստանի «խորքերը»:
Գյուղերից տեղի ունեցող արտագաղթը շատ ավելի վտանգներ է պարունակում իր մեջ, քան քաղաքներից: Արտագաղթը տեղի է ունենում գլխավորապես սահմանամերձ գյուղերից, որն առաջին հերթին թուլացնում է մեր սահմանները, քանի որ սահմանային գյուղերի թուլացումը հենց սահմանն է թուլացնում:
Երբ հեռավոր գյուղերից որևէ մեկը տեղափոխվում է քաղաք, մեզ թվում է, որ դա մեզ վրա չի ազդում անմիջականորեն, բայց արի ու տես, որ դա մոլորություն է և այդ յուրաքանչյուր գյուղացու քաղաքաբնակ դառնալը, ով էլ որ նա լինի մեզ վրա ուղղակի ազդեցություն ունի:
Ինչպե՞ս… Ուրեմն, երբ գյուղացին տեղափոխվում է քաղաք կամ լքում է երկիրը, նվազում է գյուղմթերքների, այսինքն սննդամթերքի քանակը, ինչն էլ հանգեցնում է գների զգալի աճի, քանի որ երբ գյուղաբնակը տեղափոխվում է քաղաք՝ արտադրողից վերածվում է սպառողի: Ստացվում է, որ արտադրողների քչացման և սպառողների թվի աճի հետևանքով շուկայում առաջանում է ոչ միայն դեֆիցիտ, այլև կրկնակի պահանջարկ, ինչի արդյունքում էլ գներն զգալիորեն աճում են: Ստացվում է, որ գյուղական բնակավայրերի դատարկումն իր մեջ բավականին մեծ վտանգ է պարունակում և լուրջ մարտահրավերներ է ստեղծում մարդկության համար: Տեսնու՞մ եք, ինչպես է յուրաքանչյուր անհատի տեղաշարժն ազդում բոլորիս վրա:
Բացի նշվածներից, յուրաքանչյուր երկիր լքողը ծանրացնում է մնացողների հարկային բեռը: 

մանրամասները՝ սկզբնաղբյուրում