Գործարար Տիգրան Կարապետյանը դատապարտում է Սյունիքի մարզպետի դեմ կատարված միջադեպը

Գորիսի քաղաքապետի ընտրություններում առաջադրված նախկին թեկնածու, Գորիսի «ԳԱՄՄԱ» ընկերության տնօրեն, գործարար Տիգրան Կարապետյանին երեկ կանչել են ոստիկանության Գորիսի բաժին՝ Սյունիքի մարզպետ Սուրիկ Խաչատրյանի մեքենայի ուղղությամբ հնչած կրակոցների հետ կապված։ 

«Ես դատապարտում եմ կատարվածը, ամեն բան պետք է օրենքի սահմաններում լինի»,-Fnews.am-ի հետ զրույցում այսպես արձագանքեց Գորիսի քաղաքապետի նախկին թեկնածու, Տիգրան Կարապետյանը, պատասխանելով այն հարցին, թե արդյո՞ք կարող է տեղի ունեցածը  կապ ունենալ  օրեր առաջ իր կողմից արված այն հայտարարության հետ, երբ քաղաքապետի նախկին թեկնածուն  ասում էր, որ Սյունիքի մարզպետը շուտով կստանա իր արածի պատասխանը: 

-Այդ դեպքում, ի՞նչ եք կարծում, ո՞վ կարող էր օրը ցերեկով կրակել մարզպետի մեքենայի ուղղությամբ:-

-Ոնց ես իմանամ ով էր, ես չեմ կարող այդ հարցին պատասխանել: Ամեն դեպքում ճիշտ չի դա: 

Հիշեցնենք, որ մայիսի 2-ին Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի մասնակցությամբ ծեծկռտուքից հետո մեզ հետ զրույցում Տիգրան Կարապետյանը ասել էր, որ սա մեսիջ է` ուղղված Լիսկայից իրեն, քանի որ ծեծի հետևանքով տեսողությունը կորցրած Հարություն Զաքարյանն իր մտերիմ ընկերն է:

Նոնա  Ադամյան