Գուրգեն Արսենյանը`ստվերի դեմ պայքարի մասին

ՀՀ վարչապետ Հովիկ Աբրահամյանը օրերս հայտարարել էր, որ պատրաստվում է ազատել տնտեսական դաշտը ստվերից: Նա նաեւ նշել էր, որ այդ գործի իրականացումը սկսելու է իր յուրայիններից: Թե իրականում ի՞նչ ազդեցություն կունենա տվյալ ծրագիրը որոշ գործարար պատգամավորների վրա, fnews.am-ը փորձեց ճշտել ԱԺ ԲՀԿ խմբակցության պատգամավոր Գուրգեն Արսենյանից.
-Ինչպե՞ս եք վերաբերվում ՀՀ վարչապետի հայտարարությանը` ստվերի վերացման հետ կապված:
-Վարչապետն իր քաղաքական ծրագրերի մի մասն է ներկայացրել, դա ցանկությունն է: Ես այդ ցանկությանը ըմբռնումով եմ մոտենում, պարզապես չի եղել Հայաստանի Հանրապետության մի վարչապետ, ով վարչապետ լինի եւ ասի ես սկսելու եմ զարգացնել ստվերային տնտեսությունը:
-Այդուհանդերձ, ստվերային տնտեսությունը որոշ չափով կվերանա՞ այդ հայտարարությունից հետո:
-Ստվերային տնտեսությունը երկիր մոլորակի ոչ մի երկրում չի վերանա, սակայն ինչ-որ կերպ, ինչ-որ գործիքների միջոցով կպակասի, որովհետեւ ստվերային տնտեսության պակասելն էլ է տենդենց:
-Իսկ Ձեզ վրա ստվերային տնտեսության զարգացումներն ի՞նչ կերպ են ազդելու:
-Ինձ վրա բացարձակապես ոչ մի կերպ չի ազդելու:
-Ուզում եք ասել բիզնեսներ չունե՞ք:
-Ես մի քանի ընկերությունների սեփականատեր եմ, որոնք տնտեսական գործունեություն են ծավալում Հայաստանում:
-Իսկ դրանց վրա ի՞նչ կերպ կազդի պարոն Աբրահամյանի կողմից առաջ քաշվող ծրագիրը:
-Իմ ընկերությունների վրա որեւէ ձեւով չի ազդի, որովհետեւ իմ ընկերություններն այդ դաշտում չեն գործում: Այդ դաշտում գործելու որեւէ ցանկություն նպատակ չունեն: Մենք պարզ ենք աշխատում. հարկերը, որը պետությանն է` վճարվում են:
-Ի՞նչ եք կարծում, ստվերի վերացումը ցավով կընդունվի խոշոր գործատերերի կողմից,թե՞…
-Հնարավոր է, որ ցավով ընդունվի, սակայն այդ դեպքում կա հատուկ դեղատոմս. դրանք են ցավազրկող հաբերը:
-Այս դեպքում տնտեսական ոլորտում ցավազրկումն ինչո՞վ է իրականացվելու:
-Ցավազրկումն իրականացվում է հետեւյալ կերպ. Պետության վերաբերմունքի փոփոխումով սեփականության ինստիտուտի պաշտպանվածության մեծացումով, երբ որ սեփականատերը, գործարարը հասկանում է, որ եթե ինքը ունի թափանցիկ դաշտում աշխատող եւ հարկերը վճարող մի քիչ ավելի քիչ շահութաբերությամբ բիզնես: Եվ դա արդեն այլ արժեք է ներկայացնում իրենից, որովհետեւ այն լեգիտիմ արժեք է:

Զրույցը` ՍՈՍԵ ՉԱՆԴՈՅԱՆԻ