Գյումրիի «Աստրալ» հյուրանոցի սենյակները տրամադրվել են մարմնավաճառուհիների, որոնք

1-in.am-ը գրում է.Շիրակի մարզի ընդհանուր իրավասության դատարանում Վարդան Գրիգորյանի նախագահությամբ ավարտվել է Անահիտ Չ.-ի և Ռուզաննա Թ.-ի գործի դատական քննությունը:

53-ամյա Անահիտին ու 32-ամյա Ռուզաննային մեղադրանք էր առաջադրված ՀՀ քրեական օրենսգրքի 262 հոդվածի 2-րդ մասի 5-րդ կետով:

Ըստ մեղադրանքի՝ Անահիտ Չ.-ն ու Ռուզաննա Թ.-ն, աշխատելով Գյումրիի «Աստրալ» հյուրանոցային համալիրում՝ որպես ադմինիստրատոր, գույքային օգուտ ստանալու նպատակով 2016 թվականի մայիսից մինչև դեկտեմբեր հյուրանոցի կացարանները բնակության ու պոռնկությամբ զբաղվելու համար տրամադրել են մի խումբ մարմնավաճառուհիների:

Վերջիններս հյուրանոցում սենյակներ վարձակալած հյուրերի հետ պարբերաբար ունեցել են սեռական հարաբերություններ, իսկ որպես միջնորդավճար՝ ադմինիստրատորներին յուրաքանչյուր անգամ վճարել են 1000-ից 3 հազար դրամ՝ այդ կերպ «Աստրալ» հյուրանոցը օգտագործելով որպես պոռնկությամբ զբաղվելու վայր, իսկ ադմինիստրատորները նպաստել են մարմնավաճառուհիների կողմից պոռնկությամբ զբաղվելուն՝ դրա դիմաց գույքային օգուտ ստանալով:

Բացի այդ, ըստ մեղադրանքի՝ Անահիտ Չ.-ն ու Ռուզաննա Թ.-ն նախնական պայմանավորվածություն են ձեռք բերել մարմնավաճառուհի Մ.-ի հետ և 2016 թվականի ընթացքում վերջինիս պարբերաբար հրավիրել են հյուրանոց, որտեղ մարմնավաճառուհին 5 հազար դրամի դիմաց սեռական հարաբերություն է ունեցել անծանոթ տղամարդկանց հետ՝ որպես միջնորդավճար յուրաքանչյուր անգամ ադմինիստրատորներին վճարելով 1000-ից 2 հազար դրամ:

Դատարանում Անահիտ Չ.-ն առաջադրված մեղադրանքում իրեն մեղավոր չի ճանաչել: Նա հայտնել է, թե 2016 թվականի հուլիսից մինչև դեկտեմբերի 19-ը «Աստրալ» հյուրանոցային համալիրում աշխատել է որպես ադմինիստրատոր: Ռուզաննան էլ էր աշխատում որպես ադմինիստրատոր՝ 2 օր ինքն էր աշխատում, 2 օր՝ Ռուզաննան: Իրենցից բացի՝ ուրիշ աշխատող չկար: Ադմինիստրատորի պարտականությունների մեջ է մտել՝ հաճախորդին ներկայացնել սենյակները, դրանց արժեքները, արժեքի վճարումից հետո սենյակի բանալին տրամադրել հաճախորդին:

Որևէ հարց առաջանալու դեպքում ինքը զանգել է հյուրանոցային համալիրի տնօրենին:

Երբ ինքը նոր էր ընդունվել աշխատանքի, հյուրանոցում ապրում էին «Յուքոմ» ընկերության աշխատակիցները: Հետո տարբեր այլ հաճախորդներ են եկել-գնացել: Եղել են հյուրեր, որ սենյակ են վերցրել 1-ից 5 ժամով: Պատահել է՝ հյուրանոցում մնացել են Երևանից եկած պարուհիներ, ուրիշ աղջիկներ: Նրանցից մեկը հյուրանոցում ապրում էր երեխաների հետ, նա իրենց ասել էր, թե պարուհի է գիշերային ակումբում: Նա գիշերները դուրս էր գալիս ու վերադառնում էր առավոտյան ժամը 5-6-ի սահմաններում:

Ինքը չի գիտակցել, որ հյուրանոցում մնացող կանայք զբաղվում են մարմնավաճառությամբ, իրավունք չուներ միջամտելու նրանց անձնական կյանքին: Ինքը աղջիկների համար հաճախորդ չի հրավիրել, իրավունք չի ունեցել մտնելու նրանց վարձակալած սենյակ ու տեսնելու, թե ինչ է կատարվում այնտեղ: Նույնիսկ երբ հաճախորդը սուրճ էր պատվիրում, ինքը տանում ու դռան մոտ էր բաժակը հանձնում՝ առանց ներս մտնելու:

Ինքն ու Ռուզաննան հետո են հասկացել, որ այդ աղջիկները մարմնավաճառներ են՝ երբ նրանց մոտ «շարժ» են նկատել: Իրենք մոտեցել են աղջիկներին, զգուշացրել են՝ եթե նման բան շարունակվելու է, ապա նրանք կազատեն սենյակները: Սակայն նրանք շարունակել են, իրենք էլ դիմել են տնօրենին:

Վերջինս հրավիրել է աղջիկներին, նրանք հայտնել են, որ իրենք, իրոք, մարմնավաճառներ են, տնօրենը նրանց դուրս է հրավիրել հյուրանոցից: Բայց նրանցից՝ Ի.-ն, ով երեխաների հետ էր մնում հյուրանոցում, խնդրել է անչափահաս երեխաներին փողոցում չթողնել: Խղճալով երեխաներին՝ տնօրենը թույլ է տվել, որ նրանք ապրեն հյուրանոցում մինչև վարձով բնակարան գտնելը: Ի.-ն այլևս հյուրանոցում մարմնավաճառությամբ չի զբաղվել:

Անահիտ Չ.-ն պնդել է, թե ինքը ոչ մի մարմնավաճառի չի ճանաչել, չի միջնորդել, որ որևէ մարմնավաճառ հյուրանոցում հանդիպի հաճախորդին: Իրեն որևէ մեկը միջնորդավճար չի տվել: Ինքն աշխատել է օրավարձով՝ օրը 4 հազար դրամով, և հաճախորդների քանակից կախված չի եղել իր աշխատավարձի չափը: Պատահել է՝ ինքը թեյ կամ սուրճ է մատուցել հաճախորդին, վերջինս թեյավճար է թողել: Այլ գումար ինքը չի ստացել…

Իրեն մեղավոր չի ճանաչել նաև Ռուզաննա Թ.-ն: Նա հայտնել է, թե «Աստրալ» հյուրանոցում աշխատել է երեք տարի: Մինչև Անահիտի՝ աշխատանքի ընդունվելը, ինքը մենակ էր աշխատում:

Ռուզաննան տվել է Անահիտի ցուցմունքներին համանման ցուցմունքներ, հայտնել է՝ երբ տնօրենը մարմնավաճառությամբ զբաղվող աղջիկներին դուրս է հրավիրել հյուրանոցից, նրանցից մեկը՝ Մ.-ն, ասել է. «Դե կտեսնիք»: Դրանից հետո նա գնացել ու բողոքել է:

Ըստ Ռուզաննայի՝ ինքը հավատացել է իրենց հյուրանոցում ապրող աղջիկներին, մեկն ասում էր՝ պարուհի է, մյուսն ասում էր՝ մատուցողուհի է: Նրանցից մեկը երեխաների հետ էր մնում հյուրանոցում, նրա երեխաների դայակը իր մայրն էր…

Ռուզաննան պնդել է, որ իրեն ոչ ոք միջնորդավճար չի տվել, պատահել է՝ ինքը հյութ, ծխախոտ, սուրճ, գարեջուր է մատուցել, հաճախորդները թեյավճար են թողել…

Դատարանը գործով ձեռք բերված ապացույցների համակցությամբ Անահիտ Չ.-ին և Ռուզաննա Թ.-ին մեղավոր է ճանաչել մեղսագրված արարքի համար՝ ՀՀ քրեական օրենսգրքի 262 հոդվածի 2-րդ մասի 5-րդ կետով:

մանրամասները՝ սկզբնաղբյուրում: