Գյումրու ավագանու որոշումը. ավտոմեքենա՝ Արթուր Ալեքսանյանին, հողամաս՝ Արսեն Ջուլֆալակյանին

Գյումրու ավագանին հերթական նիստի ժամանակ որոշում է կայացրել գումար հատկացնել Տաշքենդի աշխարհի չեմպիոններ, հունահռոմեական ոճի ըմբիշներ Արթուր Ալեքսանյանին ու Արսեն Ջուլֆալակյանին:

Գյումրու քաղաքապետարանի մամլո ծառայությունից 1in.am Sport-ին տեղեկացրին, որ Արթուր Ալեքսանյանի համար ավտոմեքենա ձեռք բերելու և նվիրելու համար հատկացվել է 9.880.000 դրամ: Արսեն Ջուլֆալակյանին խրախուսելու համար հողամաս է ձեռք բերվել Գյումրիում՝ 2.400.000 դրամի չափով:

Երեկ տեղի ունեցած ավագանու նիստի ժամանակ որոշում է կայացվել, և ավագանու բոլորը շատ ուրախությամբ կողմ են քվեարկել: Նախապես որոշվել էր, որ նվերները պետք է հանձնվեն Գյումրու օրը՝ հոկտեմբերի 5-ին, բայց կան կանխատեսումներ, որ այդ օրը եղանակն անբարենպաստ է: Նվերները պետք է հանձնվեն Գյումրու օրը, որը դեռ ճշտված չէ: Նվերների հանձնման արարողությունը տեղի կունենա այս ամսվա ընթացքում:

Արթուր Ալեքսանյանի համար գնվելու է Hyundai Elantra ավտոմեքենա, իսկ Արսեն Ջուլֆալակյանի համար առանձնացված է հողամաս: