Գյուղացիները վախեցել են օգնության հասնել

Կիրակնօրյա միջադեպը Արագածոտնի Թլիկ գյուղում ցնցեց ողջ Հայաստանը։ Մարդիկ սարսափներ էին պատմում, անգամ` որ «Յանդեքս» տաքսու ուղևորը կտրել է 20-ամյա վարորդ Կառլեն Գրիգորյանի գլուխը։ Իրականում, սակայն տաքսու վարորդի մարմնին բազմաթիվ ծակող-կտրող վնասվածքներ են հայտնաբերել, այդ թվում նաև պարանոցի խորը վնասվածք։ Սպանությունը տեղի է ունեցել ավտոմեքենայի մեջ, եզդիներով բնակեցված Թլիկ գյուղի մոտակայքում։

Իրավապահներին ահազանգել էր Թլիկի գյուղապետ Սլավիկ Սալոյանը։ Գյուղացիները տեսել են «Մերսեդես» մակնիշի ավտոմեքենա, որի միջից ինչ-որ մեկը օգնության է կանչել, բայց մարդիկ վախեցել են մոտենալ։

«Ավտոյից մարդ դուրս եկավ, արյունոտ, ու վազեց», - ասում է ականատեսներից մեկը։ 

Մեզ հետ զրույցում Թլիկի գյուղապետ Սալոյանը պատմեց, որ մարդասպանը վարորդի մարմինը դուրս է գցել մեքենայից ու վազել է: «Էդ տղուն դուրս  գցեց գյուղացիների դեմ, դուրս եկավ, դրսում մի հատ էլ վզին խփեց դանակով։ Ինձ պատմեցին, որ ձախ կողմից խփել ա վզին, սրտի երակը կտրել ա»։ Հարցին, թե տեսնողները քանիսն են եղել, գյուղապետը պատասխանեց՝ մի ընտանիք: Սպանության պահին գյուղապետ Սլավիկ Սալոյանը դեպքի վայրում չի եղել։ Նրան զանգահարել են գյուղից ու պատմել են արյունալի միջադեպի մասին։ Հանցագործի հետևից սահմանապահները շներ են արձակել, որոնք էլ ընկել են հետքի վրա։ Հանցագործը /քիչ ուշ պարզվեց, որ նա Գյումրու բնակիչ 24-ամյա Վարդան Հովսեփյանն է/ պատմել է, որ ինքը չի ճանաչել վարորդին, որ վարորդը ագրեսիվ է եղել, ու ինքը նրան պատժել է։ Մյուս վարկածի համաձայն, զոհն ու դահիճը նախկինում իրար ճանաչել են։ Երկուսն էլ երևանում են աշխատել որպես առաքիչներ: Նրանց մեջ, ըստ լուրերի, 10 հազար դոլարի գումարային վեճ է եղել։ Քննչական կոմիտեից ոչինչ չեն հայտնում սպանության շարժառիթների մասին։ Նշում են միայն, որ մարդասպանը հրաժարվում է ցուցմունք տալուց։

«Դեպքի վայրի զննությամբ՝ Թլիկ գյուղ տանող ճանապարհի մոտ՝ դիակի հայտնաբերման վայրից 400 մետր հեռավորության վրա, հայտնաբերվել է «Մերսեդես» մակնիշի ավտոմեքենա, իսկ մեքենայի կողքին՝ մեկ հատ դանակ: Սպանությունը կատարելու կասկածանքով Թլիկ գյուղի մոտակայքից բերման է ենթարկվել, ապա՝ ձերբակալվել Գյումրի քաղաքի 24-ամյա մի բնակիչ», - ասված է հաղորդագրության մեջ։

Սյուզան Սիմոնյան

Hraparak.am