Գյուղնախում ջերմոցատերերին ներկայացվել են պտուղբանջարեղենի արտահանման նոր ընթացակարգերը

ՀՀ գյուղատնտեսության նախարարությունում այսօր կազմակերպվել է հանդիպում, որին հրավիրվել են մի խումբ ջերմոցատերեր` պտուղ-բանջարեղենի արտահանման ընթացակարգերը ներկայացնելու նպատակով:

Այս մասին հայտնում են ՀՀ գյուղատնտեսության նախարարության տեղեկատվության և հասարակայնության հետ կապերի բաժնից։

Հանդիպմանը մասնակցել են ՀՀ գյուղատնտեսության նախարարի տեղակալներ Սամվել Գալստյանը, Գառնիկ Պետրոսյանը, Ռոբերտ Մակարյանը, ՀՀ ԳՆ սննդամթերքի անվտանգության ծառայության պետի տեղակալ Հովհաննես Հայրապետյանը, բուսասանիտարիայի տեսչության պետ Արթուր Նիկոյանը և այլ պաշտոնատար անձինք:

Փոխնախարար Սամվել Գալստյանն իր խոսքում մասնավորապես նշել է, որ Հայաստանի անդամակցությունը Եվրասիական տնտեսական միությանը լայն հնարավորություններ է ստեղծել հանրապետությունում պտուղբանջարեղենի արտադրության ու արտահանման ծավալների ավելացման համար, քանի որ այժմ ընթացակարգերն առավելագույնս պարզեցված են, և այս առումով գործող պայմանները խիստ բարենպաստ են գյուղացիական տնտեսությունների համար:

Փոխնախարար Գառնիկ Պետրոսյանն իր հերթին փաստել է, որ գյուղմթերքի տեղական արտադրության զարգացման համար պետությունը ձեռնարկում է բոլոր անհրաժեշտ միջոցառումները:

ՀՀ ԳՆ սննդամթերքի անվտանգության ծառայության պետի տեղակալ Հովհաննես Հայրապետյանը և բուսասանիտարիայի տեսչության պետ Արթուր Նիկոյանը հանգամանորեն ներկայացրել են պտուղբանջարեղենի արտահանման ընթացակարգերի փոփոխությունները:

Մասնավորապես ընդգծվել է, որ ԵՏՄ տարածքում արտահանում իրականացնելու դեպքում այժմ տնտեսավարողից որևէ փաստաթուղթ չի պահանջվում և դրա համար նրանք որևէ տեսակի վճարումներ չեն իրականացնում. գործընթացն առավելագույնս պարզեցված է, և ծախսվող ժամանակն անհամեմատ կրճատվել է:

Միակ փաստաթուղթը, որն անհրաժեշտ է ձեռք բերել արտահանում իրականացնելիս տեսչության կողմից տրվող բուսասանիտարական հավաստագիրն է, որը նույնպես տրամադրվում է անվճար: Հավաստագիրը տրվում է մաքսային ձևակերպումներ իրականացնելիս ծառայության տեսուչների կողմից` սեղմ ժամկետներում:

Պատասխանատուները հայտնել են, որ տեսուչների հեռախոսահամարները հրապարակված են www.snund.am կայքում, ինչպես նաև հորդորել են ցանկանացած հարցի դեպքում զանգահարել ծառայության թեժ գծի հեռախոսահամարով։