Հ3-Ի ԱՆՍՊԱՍԵԼԻ ՀԱՋՈՂՈՒԹՅԱՆ ԳՐԱՎԱԿԱՆԸ

Hartak.am-ի հյուրն է «Հ3» հեռուստաընկերության գլխավոր տնօրեն, թատերական փառատոնների դափնեկիր, դերասան, ռեժիսոր Արամ ՀՈՎՀԱՆՆԻՍՅԱՆԸ:

-Հայկական Երրորդ հեռուստաընկերության և ԽՍՀՄ ժողովրդական արտիստուհի Վարդուհի Վարդերեսյանի համագործակցության արդյունքն արդեն դրական արձագանք է ստացել հանրության շրջանում: Ինչպե՞ս ծնվեց «Ապրիլ. Ձոն» խորագրով գրական-երաժշտական կոմպազիցիայի մտահղացումը:

-Վարդուհի Վարդերեսյանը վաղուց ուներ նման ներկայացմամբ հանդես գալու ցանկություն: Նա դիմեց ինձ, ես սիրով համաձայնեցի, կարծում եմ ստացվեց: Այդ հաղորդումից հետո դրսից բավականին զանգեր եմ ստացել ու դեռ շարունակում եմ ստանալ: Ես երջանիկ եմ, որ այդ համագործակցությունը տեղի ունեցավ, որովհետև նա մեծագույն դերասանուհի է, բոլոր ժամանակների դերասանուհի, ով կարողանում է նորովի մատուցել յուրաքանչյուր ստեղծագործություն: Ես կարծում եմ, որ յուրաքանչյուր երիտասարդ ուսանողուհու, դերասանուհու համար Վարդուհի Վարդերեսյանը պետք է օրինակ լինի իր վարպետությամբ, իր կամքով ու աշխատասիրությամբ: Նա մարդ է, ով անկախ տարիքից միշտ նորանոր երազանքներ ու պլաններ ունի: Գործին այդպիսի յուրովի, ժամանակի շնչով, մոդեռնի մեջ մոտեցու՞մ: Ես խոնարհվում եմ նրա մեծության առջև:

-Պարոն Հովհաննիսյան, Հ3-ի տնօրեն լինելը Ձեզ համար ի՞նչ է՝ դե՞ր, թե՞ աշխատանք:

-Ես իմ առաջին մասնագիտությամբ թատրոնի ու կինոյի դերասան եմ, իսկ երկրորդ մասնագիտությամբ հեռուստառեժիսոր, նաև կինոյի և թատրոնի ռեժիսոր: Ուստի սա ինձ համար ավելին է քան աշխատանք ու ես նախ և առաջ շնորհակալ եմ հիմնադրին՝ Արթուր Բաղդասարյանին, որ ինձ առաջարկեց այս պաշտոնը: Հեռուստատեսությունն ինձ համար նոր աշխարհ է իր ձևի մեջ, սա մեծ պատասխանատվություն է ու նաև հետաքրքիր ու բովանդակալից աշխատանք:

-Այն, որ Դուք սիրված դերասան եք՝ դա անբեկանելի փաստ է: Ձեր կողմից մի քիչ դաժա՞ն չէ արդյոք Ձեր երկրպագուներին զրկել Ձեր արվեստը վայելելու հաճույքից: Կլինի՞ վերադարձ դեպի կինո ու թատրոն: Իսկ գու՞ցե հնարավոր է համատեղելիություն:

Իհարկե չի բացառվում, որովհետև ես իմ էությամբ ու տեսակով երբեք չեմ կարող հեռանալ թատրոնից: Այս ընթացքում չեմ խաղացել, որովհետև այսօր ես ավելի պատասխանատու աշխատանքով եմ զբաղված արդեն որպես բեմադրիչ, որպես հեռուստատեսության գլխավոր տնօրեն: Այսօր ինձ մոտ են գալիս խաղալու, կայանալու երիտասարդ դերասաններ, դրամատուրգներ, աշխատում եմ տաղանդավոր ռեժիսորների և մշակութային հմուտ գործիչների հետ: Ի՞նչ է սա, եթե ոչ լինել հասարակական, մշակութային, ստեղծարարական կիզակետում:

-Դուք նաև միջազգային թատերական փառատոնների մրցանակների դափնեկիր եք՝ որպես դերասան, բեմադրիչ -, ունեք Շեքսպիրյան մեծ պատմություն, կարո՞ղ է Վարդուհի Վարդերեսյանի վերը նշված ֆորմատի մեջ մի օր էլ դուք հանդես գաք:

-Ինչու՞՝ չէ: Ես իմ գիտակից կյանքի մեծ ժամանակահատվածը նվիրել եմ թատրոնին և այն ինձ տվել է իմաստություն և ուժ արարելու ու ապրելու:

Շուտով որպես հեղինակ- վարող հանդես կգամ մի թոք -շոու շրջանակներում, որը կոչվում է «Հայաստանն իրականում»: Կարծում եմ, այն բավականին մեծ հետաքրքրություն պետք է առաջացնի հայ հեռուստադիտողի մոտ:

-Սկզբից, երբ ստանձեցիք Հ3-ի տնօրենի պաշտոնը նաև թատերական շրջանակներում եղան մարդիկ, ովքեր «մտավախություն» հայտնեցին, որ «պրավալի» կտաք: Կյանքը ապացուցեց հակառակը: Ի՞նչը օգնեց ոտքի կանգնեցնել հեռուստատեսությունը:

-Այն գործը, որը ես ստանձնում եմ սկսում եմ սպիտակ էջից և կատարում եմ ամենայն պատասխանատվությամբ, վստահությամբ ու հավատքով:

Հեռուստատեսության հիմնադիր նախագահ պարոն Ա. Բաղդասարյանը ոչ միայն փայլուն քաղաքական և ազգային գործիչ է, այլև ինտելեկտուալ և առանձնահատուկ գեղագիտական ու մշակութային ճաշակի տեր անհատականություն, ով մեծ տեղ է տալիս կրթությանը, գիտությանը, մշակույթին: Նա հնարավորություն է ընձեռում մեզ, առանց մտավախությունների կյանքի կոչելու նորանոր, համարձակ ստեղծագործական գաղափարներ:

-Հայկական կինոյում, թատրոնում դերասաններից Ձեզ համար առաջինների շարքերում ովքե՞ր են: Մեկական անուն՝ կին ու տղամարդ դերասանների:

-Հավատարիմ մնալով իմ հավատամքին ինձ համար հետաքիքիր դերասանուհի կարող եմ նշել՝ Վարդուհի Վարդերեսյան, տղամարդ դերասան՝ Բաբկեն Ներսիսյան:

-Եկեք մի քիչ էլ բացերից խոսենք, որովհետև յուրաքանչյուր մեծ գործ ունենում է բացեր: Այն, որ Հ3-ը աչքի չի ընկնում հեռուստասերիալներով, դա բա՞ց է: Չէ որ ով-ով, բայց Դուք հո գիտեք սերիալների մոգական ուժը մեր հանրության վրա:

-Չէի ասի, որ դա բաց է, որովհետև այսօր մեր լրատվական, մշակութային և բազմատեսակ անհրաժեշտ հաղորդումների բլոկն այնքան ուժեղ է, այնքան ինֆորմացիա է տրամադրում մեր հեռուստադիտողի համար, որ նույնիսկ կարելի է ասել ավելի պահանջված է, քան շատ ու շատ սերիալներ:

-Այսինքն դուք այնպիսի մարտավարություն եք վերցրել, որ բնակչության քաղաքական դա՞շտն եք ապահովում:

-Ոչ, իհարկե ոչ: Այսօր մենք գեղարվեստական ֆիլմերի շատ գեղեցիկ շարք ունենք: Ինչ վերաբերվում է սերիալներին, ապա շուտով կունենանք հայկական սերիալների աշխարհում հեղաշրջում կատարող գաղափարական հզոր հենքի վրա կառուցված հայկական հեռուստանովել:

-Քաղաքականությամբ զբաղվու՞մ եք, թե՞ ոչ:

-Այսօր Հայաստանում չկա մի մարդ, ով չզբաղվի քաղաքականությամբ: Պարզապես դրանով պետք է զբաղվեն ճիշտ մարդիկ և արդյունքում կունենանք ճիշտ քաղաքականություն: Իմ քաղաքականությունը դա Հ3-ի հասարակական, մշակութային քաղաքականությունն է: Երբ ինձ հարց են տալիս, թե որն է ամենաբարդը հեռուստատեսությունում ասում եմ, դա մանկապատանեկան հաղորդումներն են: Այսօր մեր նմանատիպ հաղորդումների համար բազմաթիվ ծրագրեր ու մեթոդներ ենք ուսումնասիրում, որպեսզի հասկանանք՝ ինչ ցուցադրել, որպեսզի ճիշտ դաստիարակենք երեխաներին, չէ որ, ինչ որ տեղ դրանից է կախված մեր ապագա սերնդի որոկյալ ձևավորումը: Մենք ուզում ենք այնպիսի ծրագրեր ստեղծել, որոնք մեր երիտասարդության մեջ կձևավորեն գաղափար՝ հայրենիք, ազգ, ժողովուրդ, արժեքներ: Եթե նկատել եք մեր եթերում պահպանում ենք հայերեն խոսքը: Ոչ թե այն հայերենը, որը դրսում է հնչում, այլ հայերեն ճիշտ խոսքը: ի դեպ, մեր հաղորդաշարարեից մեկի՝ «Թեժ գծի» միջոցով այս կարճ ժամանակահատվածում բավականին միջոցներ են գտնվել և օգնություններ են տրվել անապահով ընտանիքներին: Պետք է ասեմ նաև, որ Հ3 հեռուստաալիքի կայքը շատ մեծ դիտողականություն ունի աշխարհով մեկ՝ դա բավականին ուրախալի է: Այսօր Հայաստանի բնակչության բավականին զգալի զանգվածը տոկոսը դիտում է մեր հեռուստաալիքը: Դա կատարվում է նաև համացանցի միջոցով, նաև օնլայն ռեժիմով:

-Ո՞րն է Ձեր կյանքի ամենամեծ երազանքը:

Հայաստանը տեսնել կայացած, հզոր և աշխարհում իր արժանավույն տեղը գտած: Երազում եմ, որ մարդիկ վերադառնան, մնան, արժանավայել ապրեն և ստեղծագործեն Հայաստանում:

Զրույցը վարեց՝ Արփի ՎԱՆՅԱՆԸ