Հ3-ը մեզ համար առաջին հերթին հոգեվիճակ է, նոր աշխատանք

Հոկտեմբերի 3-ին,  Հ3-ը տոնելու է իր գործունեության երեք տարին, այդ կապակցությամբ Fnews.am-ը զրուցեց  Հ3-ի ՛՛ Հարթակում՛՛ հեղինակային հաղորդաշարի պատասխանատու, Hartak.am-ի գլխավոր խմբագիր, քաղաքագետ՝ Կարեն Թումանյանի հետ: 
Պարոն Թումանյան, ինչպես հայտնի է վաղը, հոկտեմբերի 3-ին, Հ3-ը դառնում է 3 տարեկան, Դուք նույնպես Ձեր մասնակցության չափաբաժինն ունեք հեռուստալիքի կայացման գործում, ի՞նչ է Ձեզ համար հոկտեմբերի 3-ը:

-Շնորհակալություն, որ անդրադարձաք այս թեմային, քանի որ այն շատ հոգեհարազատ է ինձ համար: Անշուշտ Հ3 հեռուստալիքը ինձ համար մի նոր էջ բացեց իմ կյանքում: Օգտվելով առիթից ես կցանկանայի ասել, որ Հ3-ը այն եզակի թիվիներից է,  ով շանս է տալիս սկսնակներին փորձել իր ուժերը, փորձել ցույց տալ քեզ, ավելի ճիշտ կյանքի կոչել քո պոտենցիալ հնարավորությունները: Հենց այդպես էլ եղավ իմ պարագայում, ինձ՝ մարդու ով մինչ այդ ընդհանրապես կապ չի ունեցել հեռուստատեսության հետ, վստահեցին եթեր դուրս գալ որպես հեղինակային հաղորդաշարի հաղորդավար:

Դուք ի նկատի ունե՞ք Հ3-ի ՛՛ Հարթակում՛՛ հաղորդաշարը: 

-Այո,  և ինչպես հեռուստադիտողներն են ասում այդ էքսպերիմենտը արդարացված էր: Մեծ գոհունակության պետք է արձանագրեմ, որ իմ հաղորդումը կայացավ և շարունակում է եթեր դուրս գալ ամեն հինգշաբթի ժամը 20:00-ին:

-Իսկ ինչո՞ւ հենց հենց այդ ֆորմատը Ձեզ առաջարկվեց:

-Ինչպես գիտեք, ես բացի հաղորդաշար վարելուց, առայսօր Hartak.am-ի գլխավոր խմբագիրն եմ, և իմ խմբագրականներում միշտ էլ եղել եմ հենց այդ ֆորմատի մեջ, այսինքն փորձել արդի խնդիրները վերլուծել, փորձել գտնել դրանց դրդող պատճառները: Բնական է որ հաղորդաշարի անվանումը պատահական չի ընտրվել:

-Ում ե՞ք պարտական Հ3-ում գործունեություն ծավալելու համար:

-Առաջին հերթին նրանց ովքեր ինձ առաջարկեցին մուտք գործել և վստահեցին: Իմ հեռուստակարիերայի համար, առաջին հերթին պարտական եմ Հ3-ի հիմնադիր՝ Արթուր Բաղդասարյանին, ով ժողովրդական լեզվով ասած ՛՛ դուխ՛՛ տվեց ինձ և ասաց, որ ես կարող եմ այդ ՛՛բարիերը՛՛ հաղթահարել և օգտվելով առիթից պետք է ասեմ, որ թե իմ խմբագրական գործունեության, թե իմ հանրային և քաղաքական ճանաչման գործում ես առաջին հերթին պարտական եմ հենց իրեն: Ես մի քանի անգամ նշել եմ, որ Արթուր Բաղդասարյանին համարում եմ իմ համար մեկ ուսուցիչը, ինձ թվում է դրանով ամեն ինչ ասված է:
-Ի՞նչ կասեք Հ3-ի կոլեկտիվի մասին:
-Նախ ևառաջ շնորհակալություն եմ հայտնում Հ3-ի գլխավոր տնօրեն պարոն Հովհաննիսյանին, ում այս երեք տարիների ընթացքում հաջողվեց ստեղծել հիրավի կուռ մի համակարգ, որտեղ հավաքվել են թիվիի նվիրյալներ, որոնց համար Հ3-ը ոչ միայն աշխատանք է, այլ նաև հոգեվիճակ: Կցանկանայի շնորհակալություն ասել գլխավոր պրոդյուսեր Համլետ Ղուշչյանին, լրատվական դեպարտամենտի տնօրեն՝ Էդգար Առաքելյանին, գլխավոր խմբագիր Արա Ալոյանին և շատ ուրիշների, որոնց աշխատանքի շնորհիվ Հ3-ը շարունակում է իր գործունեությունը և նախագծում նոր՝ աննախադեպ ծրագրեր: