Հացադուլը ծայրահեղ, հուսահատ միջոց է իրավունքների պաշտպանության համար․ Արտակ Զեյնալյան.VIDEO

ԵՊՀ-ում սովորող ուսանողների կողմից նախաձեռնված բողոքի ակցիան ու դասադուլը շարունակվում են։ Ավելին, այսօր 5 ուսանող հացադուլ է հայտարարել։ Վերջիններս պնդում են՝ դասադուլը չեն դադարեցնի, քանի դեռ պետություն իր որոշումը չի փոխել։

Fnews.am-ի թղթակցի հետ զրույցում «Ելք» խմբակցության անդամ Արտակ Զեյնալյանը, անդրադառնալով վերոնշյալ թեմային, նշեց՝ Հայաստանը սահմանադրությամբ իր առջև դրված պարտականություններ ունի՝ ապահովելու քաղաքացիների ազատությունները և առաջնահերթությամբ՝ կյանքի իրավունքը, անվտանգության իրավունքը։

«Այս ամենի համատեքստում պետությունը պետք է քայլեր անի։ Դա չի կարող դիտվել այնպես, ասես պետությունը հանձնվում է, անձնատուր է լինում ուսանողների առաջ», - նշեց պատգամավորը։

Հարցին՝ գիտությունն իսկապե՞ս կտուժի, եթե այս նախագիծը կյանքի կոչվի, Արտակ Զեյնալյանը պատասխանեց․ «Այսպիսի համոզմունք արտահայտվել է բազմաթիվ անձանց կողմից, այդ թվում՝ «Ելք» խմբակցության կողմից»։
Պատգամավորը շեշտեց՝ հացադուլը ծայրահեղ, հուսահատ միջոց է իրավունքների պաշտպանության համար, հետևաբար երիտասարդները պետք է դիմեն պաշտպանության այլ միջոցների։

Հարց է առաջանում․ «Ելք»-ը կմտածի՞ ինչ-որ այլընտրանքային ծրագիր, նախագիծ, որը, գուցե, հարմար լինի երկու կողմերի, այս պարագայում՝ պետության ու ուսանողների համար։ Անդրադառնալով այս հարցին՝ Արտակ Զեյնալյանը նշեց՝ լավագույն տարբերակը կլինի այն, որ տարկետման ինստիտուտին ձեռք չտան։

Մանրամասները՝ տեսանյութում: