Հակակոռուպցիոն ու «բիզնեսազուրկ» վարչապետը հայոց.VIDEO

Comment...

«Որևէ մեկը թող ասի, որն ես այս տարիներին բիզնես եմ ծավալել...»

Ինչպես ասում են՝ ոսկյա խոսքեր, հեղինակն էլ՝ իրավամբ ազնվագույն մի մարդ՝ Հովիկ Արգամիչ Աբրահամյանը, ով իր վարչապետության տարիներին, փաստորեն, բիզնես չի ունեցել: Այո, չի ունեցել, որովհետև երբ Արգամիչն ԱԺ-ում արեց իր այդ դարակազմիկ հայտարարությունը, ոչ ոք չկարողացավ առարկել: Այսինքն, նույն հաջողությամբ, վաղն էլ Արգամիչը կարող է ասել, որ ինքը ոչ միայն իր վարչապետության տարիներին, այլ ընդհանրապես իր ամբողջ կյանքոեւմ բիզնեսով չի զբաղվել, և կրկին առարկող չի լինի: Երևի առարկող չի լինի նաև այն ժամանակ, երբ մի օր էլ Արգամիչը հայտարարի, որ նույն ԱԺ շենքի նմանությամբ Մանումենտում կառուցված շքեղ պալատն էլ իրենը չէ, կամ էլ իրենն է, բայց ինքը դա կառուցել է և դրա հետ կապված ծախսերը հոգում է իր աշխատավարձով միայն կամ էլ ժամանակին աճեցրած լոլիկների վաճառքից մնացած փողերով:
Իհարկե, որպեսզի մարդկանց մեջ ավելորդ հարցեր չառաջանան, Արգամիչը կարող էր ավելի կոնկրետ շեշտեր, օրինակ նշեր, որ Արարատի մարզում գտնվող ձկնաբուծարանների հետ էլ ինքը ոչ մի կապ չունի, նույնիսկ իր բարեկամները կապ չունեն: Ոչինչ, դա էլ կսովորի, փորձի պակասից է: Այսինքն, ինքը ընդհանուր առմամաբ փորձառու մարդ է, փորձառու բիզնեսմեն, ուղղակի վարչապետական փորձն է դեռ քիչ: Հակակոռուպցիոն ու «բիզնեսազուրկ» վարչապետ ունենք, փաստորեն:

Արտյոմ Եդիգարյան