Հալիձորի դպրոցի հիմնանորոգման ծրագրի ընդհանուր արժեքը 107 մլն 350 հազար դրամ է

Սյունիքի մարզի Հալիձոր համայնքում օրերս ավարտվել է դպրոցի շենքի հիմնանորոգումը, որն իրականացվել է «Տաթևի վերածնունդ» և Հայաստանի սոցիալական ներդրումների հիմնադրամների ֆինանսական աջակցությամբ:

Ինչպես տեղեկացնում են «Հայաստանի զարգացման նախաձեռնություններ» (IDeA) հիմնադրամի հանրային կապերի բաժնից, դեկտեմբերի 6-ին Հալիձոր այցելեցին «Հայաստանի զարգացման նախաձեռնություններ» բարեգործական հիմնադրամի հիմնադիրներ Ռուբեն Վարդանյանն ու Վերոնիկա Զոնաբենդը և հիմնադրամի տնօրեն Արմեն Գևորգյանը, ովքեր մարզային և տեղական իշխանությունների ներկայացուցիչների ուղեկցությամբ շրջայց կատարեցին դպրոցում, ծանոթացան կատարված աշխատանքների որակին և աշակերտների համար ստեղծված պայմաններին, ինչպես նաև ներկա գտնվեցին դպրոցի սաների կողմից ի պատիվ հյուրերի կազմակերպված միջոցառմանը:

Դպրոցի հիմնանորոգման ծրագրի ընդհանուր արժեքը կազմելէ 107 մլն 350 հազար դրամ, որից 51,4 մլն դրամը հատկացվել է «Տաթևի վերածնունդ» հիմնադրամի կողմից, ևս 55,9 մլն դրամ տրամադրել է Հայաստանի սոցիալական ներդրումների հիմնադրամը, որոշակի մասնակցություն են ունեցել նաև համայնքը և Սյունիքի մարզպետարանը։

«Տաթևի վերածնունդ» ծրագիրը «Հայաստանի զարգացման նախաձեռնություններ» (IDeA) հիմնադրամի խոշոր նախագծերից է, որի հիմնական նպատակներից է նաև Տաթևի վանական համալիրի հարակից համայնքների, որոնց թվում է նաև Հալիձորը, ենթակառուցվածքների բարելավումն ու համայնքների կայուն զարգացմանն աջակցությունը։