Համաշխարհային բանկը 843 մլն դոլարի օժանդակություն կտա Հայաստանին

Համաշխարհային բանկի գործադիր տնօրենների խորհրդի նիստում նոյեմբերի 7-ին քննարկվել է Հայաստանի Հանրապետության հետ Բանկի 2014-2017թթ. Երկրի գործընկերության ռազմավարությունը: Քառամյա այս ռազմավարությունը շրջանակային փաստաթուղթ է, որտեղ ուրվագծվում է Համաշխարհային բանկի օժանդակությունը երկրին: Ռազմավարությունը հիմնվում է մինչեւ 2025թ. Հայաստանի զարգացման ռազմավարության վրա` Համաշխարհային բանկի արձագանքի առանցքային գործոնը դարձնելով մասնավոր հատվածի կողմից աշխատատեղերի ստեղծումը: Այն նաեւ շեշտադրում է ավելի քան մեկ միլիոն կազմող գյուղական բնակչության կենսապահովման միջոց հանդիսացող գյուղատնտեսական ոլորտում աշխատանքի արտադրողականության բարելավումը, որը կարող է հանգեցնել ավելի մեծ տնտեսական աճի, ընդհանուր բարեկեցության եւ աղքատության ավելի արագ նվազեցման թե՛ գյուղական, թե՛ քաղաքային բնակավայրերում: Ռազմավարությամբ հաջորդ չորս տարիների համար առաջարկվում է 843 մլն ԱՄՆ դոլարի ֆինանսական օժանդակություն՝ Միջազգային զարգացման ընկերակցության (ՄԶԸ), Վերակառուցման եւ զարգացման միջազգային բանկի (ՎԶՄԲ) եւ Միջազգային ֆինանսական կորպորացիայի (ՄՖԿ/IFC) ֆինանսական միջոցների հասանելիության ապահովմամբ: «Երկրի գործընկերության ռազմավարությունը նպատակ ունի աջակցել մասնավոր հատվածում աշխատատեղերի ստեղծմանը միտված Հայաստանի զարգացումը ամրապնդող մոտեցում,» ասաց Համաշխարհային բանկի Հարավային Կովկասի տարածաշրջանային տնօրեն Հենրի Քերալին: «Այն նպատակ ունի հզորացնել Հայաստանի զարգացումը տնտեսության մրցունակության խթանման միջոցով, ինչը հնարավոր է աշխատատեղերի ստեղծմանը աջակցող առանցքային բարեփոխումների իրականացմամբ՝ ապահովելով առավել արդյունավետ ու արդարացի սոցիալական ծառայությունների մատուցում»: Ռազմավարության ներքո Հայաստանին աջակցություն կցուցաբերվի հետեւյալ երկու ուղղություններով. • Մրցունակությանն ու աշխատատեղերի ստեղծմանն ուղղված աջակցություն՝ բիզնես վարելու դյուրինացման, արտահանման ու տուրիզմի խթանման եւ ՓՄՁ-ների համար ֆինանսավորման հասանելիության բարելավման միջոցով եւ • Սոցիալական ծառայությունների մատուցման արդյունավետության ու արդարացիության բարելավմանն ուղղված աջակցություն՝ որակյալ առողջապահական, կրթական ծառայությունները հասանելի դարձնելով բոլորի, հատկապես՝ կանանց համար եւ սոցիալական ապահովության համակարգը ամրապնդելու միջոցով: Մեկ այլ կարեւոր ներկառուցված եւ մյուս ուղղությունները փոխլրացնող ուղղություն է կառավարման ու հանրային ծառայությունների ոլորտում ձեռնարկվող հակակոռուպցիոն միջոցառումների բարելավումը: Ռազմավարությունը կօգնի վերանայել գոյություն ունեցող հակակոռուպցիոն միջոցները, բարելավել հանրային վարչարարման արդյունավետությունը եւ խորացնել պետական ֆինանսների կառավարման բարեփոխումները: