Հանուն օլիգարխների պաշտպանության կամ ընդդեմ օլիգարխների նկատմամբ բռնությունների

Comment

Մեր նորանշանակ օլիգարխ-վարչապետի օլիգարխասիրությունը այն աստիճան է արտահայտված, որ նույնիսկ թաքցնելու իմաստ էլ չկա: Նշանակվելու օրվանից նրա բոլոր քայլերը միտված էին օլիգարխների իրավունքների պաշտպանությանը: Սկզբում շքեղության հարկն է վերացնում, իսկ օրեր առաջ էլ հանրահայտ Սամվել Ալեքսանյանին պատկանող «Ա և Գ» ՍՊԸ-ին, որի նախկին անվանումը «Ալեքս Գրիգ» էր, հարկային արտոնություն է շնորհում, և Եկեղեցաշեն Ալեքսանյան Բարերարը 3 տարով ազատվում է ԱԱՀ-ից՝ իր ընկերության կողմից արտադրվող օղիների համար: Կարելի է ասել՝ ստեղծվում են ամենաբարենպաստ պայմանները՝ երկրում հարբեցողության զարգացման համար, այն էլ «Ա և Գ» ՍՊԸ-ի արտադրած խմիչքով: Իսկ որքան հարբած և անգիտակից լինեն բնակիչները, այնքան ավելի հետ «կթռփոշանան» օլիգարխները: Ի դեպ, հարբեցնում են ոչ միայն հայաստանցիներին, այլ նաև իրաքցիներին և մի շարք այլ հարևան երկրների բնակիչներին, որտեղ Ալեքսանյանը պատրաստվում է արտահանել իր օղիները: Այնպես որ Իրաքում նրա դեսպան նշանակվելու մասին զավեշտալի խոսակցություններն այնքան էլ օդից չէին, դեսպան չնշանակվեց, բայց օղիները իրացրեց:
Ինչևէ, եթե կառավարությունը շարունակի այս տեմպերով, ապա մոտ ապագայում Կառավարությունը կարելի է վերանվանել «Օլիգարխների իրավունքների պաշտպանության հ/կ» կամ «Ընդդեմ օլիգարխների նկատմամբ բռնությունների հ/կ», որը նույնիսկ կարող է գրանտներ ստանալ և արդյունավետ կերպով պաշտպանել այդ խեղճ ու հալածված խավի իրավունքները:

Արտյոմ  Եդիգարյան