Հարկը արտագնա աշխատողների եկամուտների վրա չի ազդի. փոխնախարարը բացատրում է օրենքի դրական կողմերը

Ֆինանսների փոխնախարար Վախթանգ Միրումյանը այսօրԱԺ-ում լրագրողների հետ զրույցում փորձեց բացատել թե ինչ է իրենից ենթադրում ««Եկամտային հարկի մասին» ՀՀ օրենքում փոփոխություն և լրացում կատարելու մասին» օրենքի նախագիծը: Փոխնախարարի խոսքով օրենքը չի վերաբերելու ՀՀ քաղաքացիներին, ովքեր գնում են արտերկրում ինչ-որ անհատների համար աշխատանք են կատարում ու հետ գալիս: «Քաղաքացիները, որոնք գրանցվում են օտարերկրյա կազմակերպությունում տվյալ կազմակերպությունները շահութահարկ են վճարում և պահում են նաև եկամտահարկ, հիմա խոսքը նրա մասին է, որ ոչ թե արտագնա աշխատողներին հարկել, այլ ստեղծել հնարավորություն, խթանող հանգամանք, որպեսզի դրսի կազմակերպությունների սեփականատերերը շահագրգռված լինեն իրենց կազմակերպությունները գրանցել ՀՀ-ում»,-ասել է նա:

Վախթանգ Միրումյանի խոսքով՝ օրենքը արտագնա աշխատողների եկամուտների վրա չի ազդում, այլ դրա համար իրավասու են շինարարական ընկերությունները, որոնց համար էլ Կառավարությունը ՀՀ-ում գրանցվելու խթանիչ կողմեր է մշակել։ «Մենք պետք է խթանենք, որպեսզի դրսի կազմակերպությունները գան գրանցվեն Հայաստանում»,- ասաց նա և նշեց, թե որպեսզի գրանցվեն ՀՀ-ում, շահութահարկը սահմանում են 5%, իսկ եկամտահարկի դրույքաչափը՝ նվազեցնում:

Իսկ թե մտավախություն չկա, որ այդ երկրների հարկային մարմինները կարող են գլխի ընկնել ու հետագայում խնդիրներ առաջացնեն, Միրումյանը նկատեց, թե հարցը որևէ մութ կողմ չունի: մ: «ՀՀ-ն որևէ սահմանափակում չունի շահութահարկի կամ եկամտահարկի ցանկացած դրույքաչափ սահմանելու հարցում: Դա ՀՀ որոշումն է, ԵՏՄ անդամակցության պայմանագրով դրույքաչափերի ներդաշնակեցման կամ չփոփոխելու որևէ պարտավորություն մենք չունենք և որևէ բանի չի հակասում»,- ասաց նա:

Լրագրողներից մեկի հարցին, թե այսինքն՝ ստացվում է կազմակերպությունը գրանցվում է Հայաստանում, աշխատող է ուղարկում ՌԴ և ՌԴ բյուջե փող չի տալիս, Միրումյանը պատասխանեց. «Ոչ, մենք տալիս ենք խթան, հնարավորություն, կուզենան կօգտվեն, չէ՝ չէ: Կազմակերպությունն իրավաբանական անձի տեսքով է իր գործունեությունն իրականացնում: Կազմակերպություններն ունեն իրար հետ պայմանագիր: ՀՀ կազմակերպությունը ծառայություններ է մատուցում արտերկրի կազմակերպությանը, ծառայությունները մատուցում է իր կողմից վարձած աշխատողների միջոցով, սրանք հարկային սխեմաներ են, որոնք կիրառվում են: Դա ոչ թե վարձու աշխատանքի կողմից մատուցված եկամուտ է, այլ ձեռնարկատիրական գործունեությունից մատուցված եկամուտ, հարկվում է ռեզիդենտության սկզբունքով»։ Փոխնախարարը նաև նկատեց, որ բացառվում է կրկնակի հարկումը: