Հայաստանն ազատ խոսքի և ազատ մամուլի երկիր է. Սերժ Սարգսյան

Եվրանեսթ ԽՎ չորրորդ լիագումար նիստի պաշտոնական բացման արարողությունը սկսվեց ՀՀ Նախագահ Սերժ Սարգսյանի ելույթով: Նախագահ Սարգսյանը կարևորեց ԵՄ-ի Արևելյան գործընկերության շրջանակում միջխորհրդարանական համագործակցությունը: «Եվրանեսթ խորհրդարանական վեհաժողովի երևանյան հանդիպումը լավ առիթ է մեր հասարակություններին հուզող հարցերի շուրջ մտքերի և տեսակետների անկաշկանդ փոխանակման, անկեղծ երկխոսության համար:

Վստահ եմ, որ միջխորհրդարանական քննարկումները թույլ կտան ճիշտ պատկերացումներ կազմել մեր ժողովուրդների առջև կանգնած մարտահարավերների մասին և փորձել միասին գտնել դրանց հաղթահարման ուղիները»- ասաց Սերժ Սարգսյանն ԱԺ ամբիոնից և հավելեց, որ Հայաստանն այսօր ազատ խոսքի և ազատ մամուլի երկիր է:

«Մենք ունենք հավաքների ազատություն, կայացած քաղաքացիական հասարակություն, որը գիտի, թե ինչպես կարող է պայքարել և իր տեսլականը կյանքի կոչելու համար մեծ դերակատարում ունենալ: Հայաստանում ժողովրդավարական գործընթացներն ավելի խորացնելու նպատակով մենք նախաձեռնել ենք Սահմանադրական բարեփոխումներ՝ նպատակ ունենալով կատարելագործել իրավունքի գերակայության սկզբունքի իրացման, մարդու հիմնական իրավունքների և ազատությունների երաշխավորման սահմանադրական կառուցակարգերը»:

ՀՀ նախագահը, անդրադառնալով Հայաստան-ԵՄ համագործակցությանն, ասաց, որ հենվելով ընդհանուր արժեքների վրա՝ Հայաստանը հանձնառու է զարգացնել համագործակցությունը ԵՄ-ի հետ՝ ուղղված ժողովրդավարական հաստատությունների և դատական համակարգի շարունակական բարելավմանը, մարդու իրավուքների և իրավունքի գերակայության խթանմանը, արդյունավետ կառավարմանը, կոռուպցիայի դեմ պայքարին, քաղաքացիական հասարակության ամրապնդմանը, առևտրի ու ներդրումների ընդլայնման համար գործարար միջավայրի հետագա կատարելագործմանը, շարժունակության գործընկերության շարունակական իրականացմանը և ոլորտային համագործակցության ընդլայնմանը:

Սերժ Սարգսյանը նշեց նաև, որ ակնկալում է խորհրդարանականների աջակցությունը ԵՄ երկրներ, ՀՀ քաղաքացիների համար, առանց մուտքի արտոնագրի վիզայի մուտք գործելու հնարավորության վերաբերյալ երկխոսություն սկսելու հարցում: Սերժ Սարգսյանը հույս հայտնեց, որ միասնական ջանքերի շնորհիվ հնարավոր է նոր մոտեցումներ գտնել քաղաքացիների համար տարբեր ինտեգրացիոն կառույցներից փոխադարձաբար լավագույնս օգտվելու հնարավորության համար: Սերժ Սարգսյանն անդրադարձավ նաև ԼՂ հակամարտության կարգավորմանը, Հայոց Ցեղասպանության դատապարտման գործընթացին: