Հայաստան-Ֆրանսիա կայանալիք խաղից առաջ

Երեւան, «Հանրապետական» մարզադաշտ, 20:00
Ընկերական հանդիպում
Ուղիղ եթեր՝ «Առաջին ալիք»
Մրցավար՝ Իշտվան Կովաչ (Ռումինիա)
Բուքմեյքերներ՝ 8.20-4.40-1.40

Այսօր՝ հոկտեմբերի 14-ին Հայաստանի հավաքականն ընկերական հանդիպում կանցկացնի Ֆրանսիայի ընտրանու հետ: Վազգեն Սարգսյանի անվան «Հանրապետական» մարզադաշտում կայանալիք խաղում երկու հավաքականների գլխավոր մարզիչները կկատարեն մի շարք փորձարկումներ:

Հոկտեմբերի 11-ին Հայաստանը «Եվրո-2016»-ի ընտրական փուլի շրջանակում 1:1 հաշվով ավարտեց Սերբիայի հետ մրցավեճը: Այս խաղում հայ ֆուտբոլիստները մեծ ծավալի աշխատանք կատարեցին՝ բոլոր ուժերը թողնելով խաղադաշտում: Նման ծանր խաղից հետո Հայաստանը վերականգնվելու համար բավական քիչ ժամանակ ուներ, ուստի այսօրվա խաղում Բերնար Շալանդը մի շարք փոփոխություններ կիրականացնի:

Խաղն ընկերական բնույթ է կրում եւ կողմերը 6-ական փոխարինման հնարավորություն են ունենալու:

Պատմություն
Ֆրանսիան այն 17 հավաքականներից մեկն է, որոնց հետ անցկացրած բոլոր հանդիպումներում էլ մեր ֆուտբոլիստները պարտվել են։

Հայաստանի և Ֆրանսիայի հավաքականների առաջին ծանոթությունը տեղի է ունեցել 18 տարի առաջ` 1996թ. հունիսի 5-ին ֆրանսիական Վիլնյով դ' Ասք քաղաքում։ Ընկերական այդ խաղում ՀՀ հավաքականը Սամվել Դարբինյանի գլխավորությամբ մրցակցին զիջեց 0:2 հաշվով։ Գոլերի հեղինակներ դարձան Ժոսելին Անգլոման և Միքայել Մադարը:

Այդ խաղում Հայաստանի հավաքականը հանդես եկավ հետևյալ կազմով. Հարություն Աբրահամյան, Երվանդ Սուքիասյան, Վարդան Խաչատրյան, Սարգիս Հովսեփյան, Սարգիս Հովհաննիսյան, Հակոբ Տեր-Պետրոսյան (Երվանդ Կրբաշյան, 74), Արթուր Պետրոսյան, Ռազմիկ Գրիգորյան (Արսեն Ավետիսյան, 65), Համլետ Վ. Մխիթարյան, Արամայիս Տոնոյան (ա, Հարություն Վարդանյան, 58), Վարազդատ Ավետիսյան:

Ֆրանսիացիների կազմում խաղին մասնակցած ֆուտբոլիստների թվում էին նաև Ֆրանսիայի հավաքականի ներկայիս գլխավոր մարզիչ Դիդյե Դեշամը, Զինեդին Զիդանն ու Յուրի Ջորկաեֆը:

Մրցակիցների միջև հաջորդ 2 հանդիպումները տեղի ունեցան 2000թ. Եվրոպայի առաջնության ընտրական մրցաշարում, որում Հայաստանի և Ֆրանսիայի հավաքականները հայտնվել էին միևնույն խմբում։

Ընտրական առաջին հանդիպումը կայացավ 1999թ. մարտի 31-ին Սեն Դենիի «Ստադ դը Ֆրանս» մարզադաշտում: Տանտերերը հաղթեցին 2:0:

Արդեն 3-րդ րոպեին Սիլվիան Վիլտորը բացեց հաշիվը, իսկ ընդմիջման գնալուց անմիջապես առաջ Քրիստոֆ Դյուգարին 2-րդ գնդակը խփեց:

Հայաստանի հավաքականն այդ խաղում հանդես եկավ այսպիսի կազմով. Ռոման Բերեզովսկի, Երվանդ Սուքիասյան (ա), Արթուր Մկրտչյան (Վարդան Խաչատրյան, 39), Սարգիս Հովսեփյան, Սարգիս Հովհաննիսյան, Հարություն Վարդանյան, Արթուր Պետրոսյան, Արթուր Ոսկանյան (Հայկ Հարությունյան, 76), Ալբերտ Սարգսյան, Արմեն Շահգելդյան (Տիգրան Եսայան, 52), Կարապետ Միքայելյան:
Աշխարհի չեմպիոնների հետ պատասխան հանդիպումը կայացավ 1999թ. սեպտեմբերի 8-ին Երեւանում: Խաղը շատ հաջող սկսվեց մեր ֆուտբոլիստների համար, որոնք արդեն 6-րդ րոպեին Կարապետ Միքայելյանի հարվածից հետո բացեցին հաշիվը: Սակայն հետագայում Յուրի Ջորկաեֆը 11մ հարվածով, Զինեդին Զիդանն ու Լիլիան Լասլանդը 3 անգամ գրավեցին Ռոման Բերեզովսկու պաշտպանած դարպասը: Խաղավերջում Արմեն Շահգելդյանը հստակ իրացրեց 11մ հարվածը` արձանագրելով հանդիպման վերջնահաշիվը` 2:3: