Հայաստանի շանսը գլոբալ երկխոսությունն է աշխարհում

Ի՞նչ նպատակ էին հետապնդում ՌԴ-ի նկատմամբ Եվրոպայի պատժամիջոցները, եւ ի՞նչ ազդեցություն այն կունենա Հայաաստանի վրա, այս եւ այլ հարցերի շուրջ Fnews.am-ը զրուցեց "Հայ-ռուսական համագործակցություն" կազմակերպության ղեկավար ՅՈՒՐԻ ՆԱՎՈՅԱՆԻ հետ:

-Պարոն Նավոյան ի՞նչ եք կարծում, որն էր Եվրոպայի բուն նպատակը` ՌԴ-ի նկատմամբ պատժամիջոցներ կիրառելու մասին որոշում կայացնելիս:

-Մենք գործու ունենք երկու մոտեցման հետ. ՌԴ-ի արտաքին քաղաքականության հայեցակարգը սահմանում է, որ Ռուսաստանի նպատակն է իր սահմանների երկայնքով բարյացակամ տրամադրված քաղաքականության ձեւավորում իր նկատմամբ` հարեւան երկրների կողմից: Մյուս կողմից` Ռուսաստան-Եվրոպա բավական լավ համագործակցություն այնուամենայնիվ կար: Բայց եկավ մի պահ, երբ Արեւելյան գործընկերության քաղաքականությունը ինչ-որ մի պահի ՌԴ-ն ընկալեց իր սահմանների երկայնքով հակառուսական հարթակների ձեւավորում: Այսինքն այստեղ էր, որ ՌԴ-ն վտանգ տեսավ իր տնտեսության եւ անվտանգության համար: Եվ սա պայթեց Ուկրաինայով: Իսկ այս տարի ամռանը Ադրբեջանի կողմից սանձազերծած այս դիվերսիոն իմաստով պատերազմը, որը ՌԴ-ի կողմից բավական խիստ ազդեցություն ունեցավ եւ հրապարակային եւ ոչ հրապարակային առումով, որովհետեւ այդ ոլորտը առնչվում է փակ դիվանագիտությանը: Եվ մենք տեսանք, որ դա դրսեւորվեց Սոչիի հանդիպումով, երբ ՌԴ նախագահի կողմից հստակ ազդանշաններ արվեցին: Այս իմաստով իհարկե Ուկրաինան մտավ որոշակի առումով հակառուսական քաղաքականության մեջ եւ այսօր տեսնում ենք դրա արդյունքները: Այնուամենայնիվ ցանկացած իրավիճակում կան երկխոսության խողովակներ, տեսնում եք, որ նույն Ուկրաինայի քաղաքական իրավիճակի հետ կապված` Բրյուսել- Մոսկվա կամ Մոսկվա-Վաշինգտոն խողովակները աշխատում են: Հայաստանի շանսը գլոբալ երկխոսությունն է աշխարհում, որովհետեւ մենք այդքան ռեսուրս չունենք եւ հայության աշխարհասփյուռ վիճակն էլ մեզ թույլ չի տալիս լինել որեւէ փակ համակարգում, մեր շանսը գլոբալ երկխոսությունն է: Եվ կարծում ենք, որ այս փուլում Հայաստանը հնարավորություն կունենա բոլոր ուղղություներով զարգացնել ե'ւ տնտեսական ե'ւ թե քաղաքական հարաբերությունները:

-Այդուհանդերձ, ի՞նչ ազդեցություն կունենան ՌԴ-ի նկատմամբ կիրառվող պատժամիջոցները Հայաստանի վրա:

-Բնականաբար համաշխարհային տնտեսությունը գլոբալ է` փոխհամակցված: Եվ ինչպես գիտեք Ռուսաստանը վերջին երկու տասնամյակի ընթացքում աստիճանաբար քայլեր էր անում համաշխարհային տնտեսությանը ինտեգրվելու, դրա համար իհարկե այս պատժամիջոցները բավական լուրջ ազդեցություն ունեն ՌԴ-ի վրա` թեեւ դրան զուգահեռ Ռուսաստանը ներքին ռեսուրսների վերաբաշխում է կատարում, որպեսզի կարողանա համարժեք չեզոքացում եւ փոխհատուցում անի իր տնտեսության համար: Եվ այս պայմաններում անշուշտ այն ՀՀ-ի տնտեսության ոլորտները, որոնք փոխկապակցված էին իրենց հերթին ՌԴ-ի այն ոլորտների հետ, որոնք այս պատժամիջոցների պատճառով կարող են որոշակի կորուստներ ունենալ, իհարկե, կարող են զգայուն  լինել նաեւ մեզ համար: Դրա համար մենք ինքներս նույնպես պետք է կարողանանք հաշվարկել այն ուղղությունները, որտեղ հայ-ռուսականան տնտեսական հարաբերություներում կարող են Հայաստանի համար ճեղքումային լինել, որովհետեւ ՌԴ-ի շուկան եղել եւ մնում է բավական գրավիչ Հայաստանի համար: Եվ Հայաստանը, ըստ էության կապված է ռուսասատանյան շուկայի հետ: Օրինակ, այս սանկցիաների արդյունքում ՌԴ-ն անդրադարձավ, որ ինքը լինելով գյուղատնտեսական երկիր, չի վերամշակում այլ ներկրում է գյուղատնտեսական մթերքներ եւ վերամշակված ապրանքներ, միանգամից պահանջված դարձավ Հայաստանի եւ ԱՊՀ կամ ՌԴ-ին հարակից այլ երկրների գյուղատնտեսական ապրանքները: Այս իմաստով սա հնարավորություն Է Հայաստանի համար, եւ իհարկե իր մեջ որոշակի մարտահրավերներ է պարունակում: Բայց ինչպես գիտեք, որեւէ ստանդարտ եւ ստատիկ վիճակ ցանկացած իրավիճակում չկա, միշտ պետք է ճիշտ հաշվարկել արտահանման քաղաքականություներն ու ուղղությունները եւ ըստ իրավիճակի կարողանալ ճկուն վերադասավորում անել:

Զրույցը` Նոնա  Ադամյանի