«Հայաստանում ցայտնոտային իրավիճակ է. աջ ձեռքը չգիտի, թե ինչ է անում ձախը».քաղաքագետ

«Քաղաքագիտական առումով կարող եմ ասել, որ Հայաստանում ցայտնոտային իրավիճակ է բոլոր բնագավառերում, եւ ինչպես գյումրեցիներն են ասում «աջ ձեռքը չգիտի, թե ինչ է անում ձախը»,-Newsmedia-ի թղթակցի հետ զրույցում ասաց հայտնի քաղաքական վերլուծաբան ԳԱԳԻԿ ՀԱՄԲԱՐՅԱՆԸ, նկատելով.

-Նախ անդրադառնամ ՊՎԾ պետի, որպես կասկածյալ ներգրավվելուն: Շատ տարօրինակ է, որ կոռուպցիայի դեմ պայքարող մարմնի ղեկավարը՝ կասկածյալի կարգավիճակում է: Առավել տարօրինակ է, որ այսօր գլխավոր դատախազը խնդրում է լրագրողներին, որ չպատասխանի այդ հարցին: Միայն այդ հանգամանքը, որ գլխավոր դատախազը կամ իրավապահ այլ մարմնի ներկայացուցիչներ չեն ցանկանում մեկնաբանել` ինքնին խոսում է այն մասին, որ այստեղ խնդիրներ կան: Եվ տվյալ պարագայում շատ բարոյական կլինի, որ նույն Դավիթ Սանասարյանը հրաժարական տա. թող հետաքննությունը անցկացվի վերջանա, եւ եթե պարզվի, որ նա անմեղ է` վերականգնվի իր աշխատանքին: Հիմա լինելով ՊՎԾ պետ, ինքը կարող է շատ կոնկրետ ազդել նախաքննական մարմնի վրա: Իսկ եթե կան կասկածներ. շատ լավ կլինի, որ ինքը ինքնակամ կամ արձակուրդ վերցնի հեռանա, կամ ժամանակավորապես լքի այդ պաշտոնը՝ մինչեւ նախաքննության ավարտը: Թե չէ ֆեյսբուքյան գրառումները, «լավ տղա խաղալը», արդեն շատ է նյարդայնացնում մարդկանց:
Անդրադառնալով ԱԺ-ում տեղի ունեցող թեժ քննարկումներին, հատկապես՝ Մխիթար Հայրապետյանի դրսեւորած աննախադեպ պոռթկումներին, քաղաքագետը ընդգծեց.
- Երեւի պարոն Հայրապետյանը չի հասկանում, որ տարիքը բացարձակ կապ չունի. մարդը պետք է գիտակ եւ պրոֆեսիոնալ լինի իր գործում: Ինչն ի դեպ, իր հարազատ խմբակցության ներսում շատ քիչ անդամների մոտ է նկատվում: Եվ երբ իրենց հետ լավ չեն խոսում, դա նրանից չէ, որ իրենք տարիքով երիտասարդ են: Իրենց հետ լավ չեն խոսում, որովհետեւ իրենք կամ դիլետանտն են, կամ ոչ պրոֆեսիոնալ: Եվ իրենք իրենց քանակով փորձում են ճնշել պրոֆեսիոնալիզմը, այո քանակը շատ կարեւոր է, բայց քանակը պետք է նաեւ որակ դառնա: Անորակ քանակը կարող է պատուհաս դառնալ ամբողջ երկրի համար, իսկ իրենք այս ամիսների ընթացքում բացահայտ ցույց են տվել, որ չեն էլ ցանկանում որակական ձեռքբերումներ ունենալ, եւ շարունակում են իրենց պրիմիտիվ քաղաքականությունը, ինչի հետեւանքով տուժում է ամբողջ երկիրը: