Հայերը պատրաստ են առաջ շարժվել. The Washington Post-ի անդրադարձը Արցախյան հակամարտությանը

The Washington Post հեղինակավոր ամերիկյան պարբերականը «Ղարաբաղ. վերսկսված պատերազմ Կովկասում» վերտառության հոդված է հրապարակել: Հոդվածագիր Դևիդ Իգնատիուսը Լեռնային Ղարաբաղի Հանրապետությունում զրուցել է տեղի ղեկավարության, քաղաքացիական հասարակության ներկայացուցիչների, զինվորականների հետ:
«Ինքնահռչակ հայկական հանրապետության հրամանատարը երկուշաբթի մեզ հետ զրույցում կանխատեսեց, որ փխրուն հրադադարը կարող է այլևս չլինել մի քանի օրվա ընթացքում: Այդ գիշեր հյուսիսային սահմանի մոտ ադրբեջանական կրակոցներից զոհվել է երկու հայ զինվոր»,- այսպես է հոդվածագիրը սկսում նկարագրել Արցախում ստեղծված իրավիճակը:
Այնուհետև ներկայացվում է հակամարտության պատմությունը և ապրիլի 2-ից ծավալված իրադարձությունները, Ռուսաստանի միջնորդությամբ հրադադարի բանավոր պայմանավորվածության ձեռքբերումը:
«Ես այցելեցի Ղարաբաղ մի քանի արտասահմանյան լրագրողների և Եվրախորհրդարանի պատգամավորի հետ, որը կազմակերպել էր հայկական կառավարությունը: 90 րոպե տևած ուղղաթիռի թռիչքով մենք տեսանք այդ հրաշալի լեռնային փարթամ ու մեկուսացված անկլավը, որի անունն է «սև այգի»: Այցիս ընթացքում ինձ թվում էր, որ դա Կովկասի Շվեյցարիա է, ոչ միայն լեռներ են, այլև կոկիկ փողոցներ, սարի լանջերին ֆերմաներ և կատաղի անկախ մարդիկ»,- գրել է The Washington Post-ի հոդվածագիրը:
Վերջինս ներկայացրել է Արցախի պաշտպանության նախարար Լևոն Մնացականյանի հետ զրույցը, որի ընթացքում նա նշել է, որ հայկական զինված ուժերի համար անսպասելի է եղել ապրիլի 2-ի ադրբեջանական լայնածավալ հարձակումը` չնայած որ նախանշաններ եղել են:
«Մարտավարական առումով նրանք գուցե ունեցել են որոշ հաջողություն, սակայն հաշվի առնելով, թե ինչպիսի ուժեր են վատնել այդ հաջողությանը հասնելու համար, կարելի է ասել, որ դա ավելի շուտ պարտություն է իրենց համար»,- ասել է Լևոն Մնացականյանը` նկատի ունենալով ադրբեջանական զինված ուժերի կողմից մի քանի դիրքի գրավումը: Մնացականյանը հավելել է, որ հայկական զինված ուժերը կարող են ինքնուրույն պաշտպանել Արցախն` առանց Ռուսաստանի աջակցության:
«Քառօրյա պատերազմի արդյունքը ցույց է տալիս, որ մեր ունեցած տեխնիկան և մեր մարտական պատրաստությունը թույլ է տալիս ցանկացած հակառակորդի կանգնեցնել։ Եթե պատերազմը վերսկսվի, մենք ոչ միայն նրանց ետ կմղենք, այլև առաջ կշարժվենք»,- ասել է Լևոն Մնացականյանը:
Իսկ հայ-ադրբեջանական խաղաղ հաշտեցման համար նախկինում պայքարող Կարեն Օհանջանյանը նշել է, որ փոխել է տեսակետը նոր պատերազմը սկսվելուց հետո: Երբ վերջին պատերազմն ավարտվել էր, նա կողմնակից էր ադրբեջանցիների հետ երկխոսության, սակայն հիմա նա այլևս խաղաղության մասին չի մտածում, այլ ցանկանում է, որ հայկական զինված ուժերը ոչնչացնեն Ադրբեջանի տնտեսական օբյեկտները:
«Անցնող ամսվա ընթացքում մեր ժողովուրդը կորցրեց իր պատրանքները»,- Կարեն Օհանջանյանի խոսքերն է մեջբերում հոդվածագիրը:
Վերջում The Washington Post-ի լրագրողը նշել է, որ Արցախում տեսել է «Բաբո-Դեդո» հուշարձան կոթողը, որի պաշտոնական անունն է «Մենք ենք մեր սարերը»: Ենթադրաբար այդ անվանման ուղերձն է` «Մենք չենք լքում», ինչը նշանակում է, որ առջևում անզիջում, երկար հակամարտություն է, եզրափակել է ամերիկյան պարբերականը: