Հայրապետյանը քաղաքում չի.ինչ ուզում եք գրեք...

Երեկվանից ողջ համացանցը ողողված է տեղեկատվությամբ, որ երեկ երեկոյան Ռուբեն Հայրապետյանի (Նեմեց Ռուբո) թիկնազորի անդամները առևանգել են  գործարար, «Էյր Արմենիա» (Air Armenia) ավիաընկերության 51 տոկոսի սեփականատեր և տնօրեն Արսեն Ավետիսյանին: Այս մասին YN.am լրատվական կայքին հաղորդել էր Արսեն Ավետիսյանի կինը` Իզաբելլա Մելքումյանը:
Դեպքը տեղի է ունեցել18:00-ից 19:00-ն ընկած ժամանակահատվածում Ռուբեն Հայրապետյանին պատկանող Հարսնաքար ռեստորանային համալիրի հարևանությամբ գտնվող Ֆուտբոլի ֆեդերացիայի լողավազանի սրճարանում, ուր նախապես ունեցած պայմանավորվածության համաձայն այցելել է Արսեն Ավետիսյանը և հանդիպել Հայրապետյանին: Հանդիպման ընթացքում բարոյական ճնշումներին տեղիք չտվող Ավետիսյանի նկատմամբ լողավազանում հանգստացող բազմության ներկայությամբ կիրառվել է ֆիզիկական ուժ:

Արսեն Ավետիսյանին անակնկալի բերելով՝ նրան տարբեր կողմերից միաժամանակ սկսել են հարվածել Հայրապետյանի թիկնազորի ներկայացուցիչները, որոնք եղել են զինված և զենքի ուժի ճնշման տակ Ավետիսյանին քաշքշելով սրճարանից առևանգել ու տեղափոխել են Ֆուտբոլի ֆեդերացիային հարակից շենք: Լողավազանում հանգստացող ընտանիքները, քաղաքացիներն ու երեխաները, ականատես լինելով հարձակմանը, շփոթված փախուստի են դիմել, ոմանք հասցրել են հավաքել իրենց իրերը, իսկ ոմանք էլ դուրս են եկել լողավազանի տարածքից լողազգեստներով՝ հեռացնելով իրենց երեխաներին: 

Կատարվածի առնչությամբ, Fnews.am-ը փորձեց ստանալ նաեւ ՀՖՖ նախագահ Ռուբեն Հայրապետյանի (Նեմեց  Ռուբոյի) մեկնաբանությունը, ում բջջային հեռախոսին պատասխանեց մի տղամարդ, եւ հարցը լսելուն պես փոխանցեց հետեւյալը. «Հայրապետյանը քաղաքում չի: Իրա հետ չեք կարա խոսաք: Ինչ ուզում գրեք: Այ քեզի բան»: 

Ն. Ադամյան