Հայրենիքը շատ վեհ գաղափար ու իմաստ է, աստվածային՝ կյանքից թանկ

«Արվեստագետ» մշակութային հ/կ ղեկավար, նույնանուն ամսագրի գլխավոր խմբագիր, «Համազգային արտիստը» գրքի հեղինակ Իվան Անտոնյանը NewsMedia.am-ի հետ զրույցում պատասխանել է NewsMedia.am-ի մի քանի բլից հարցադրումների, որն էլ որ ներկայացնում ենք ստորեւ.

-Պարոն Անտոնյան, այլեւս պատմություն դարձած 2021-ը Տարի էր....

-Նախ Շնորհակալ եմ NewsMedia.am-ին  հյուրընկալելու համար։ Ինչ վերաբերում է հարցին, պիտի ասեմ, որ երբ երկրագունդը պտտվում է և մարդկությունը իր շարունակական հարահոս ընթացքի մեջ է, ապա՝ յուրաքանչյուր տարի՝ տարի է իր լավ ու վատ կողմերով։
Սակայն 2021-ը , մեր սրտերում անբուժելի վերք թողեց. Արցախի մեծ մասի կորստով։ Իմ խոնարհումն եմ բերում մեր քաջ որդոց սրբասուրբ ԱՆՈՒՆՆԵՐԻ առջև։ Ուզում եմ, որ երբևէ պարտություն չունենանք և ոչ մի ոլորտում։ Քանզի հայը՝ մաքառելով հանդերձ վերհառնելու հատկություն ունի, ունի կամք ու ոգի։ Ուրեմն՝ ՄԵՆՔ ՈՒԽՏ ՈՒՆԵՆՔ ՄԻՆՉ ԴԵՊԻ ԼՈՒՅՍ. մենք պիտի  «գնանք լույսի ետևից, քանզի դրանից լավը, գուցե չկա»։

-Ի՞նչ սպասել 2022-ին՝ ահարկու  Վագրի իշխանության ներքո...

-Անկեղծ ասած՝ վագրի կենդանակերպն այդքան էլ ահարկու չի։ Ես՝ ինքս այդ նշանի տարում եմ ծնվել՝ 1986-ին, և ահարկու եմ ճիշտն ու ճշմարիտը արտահայտելու մեջ։
Իմ կարծիքով՝ 2022-ը նոր մտքի, նոր գաղափարների տարի է լինելու Հայոց համար։ Իմ օրինակը համեմատելով պիտի ասեմ, որ վագրը հաստատ ահարկու-հաղթանակներ է բերելու Հայաստան աշխարհին ու ի սփյուռս հայության։
Ամեն դեպքում, յուրաքանչյուրս պիտի բարի լինենք մեր յուրաքանչյուր արարքում։

-Ասում են Պատերազմները մեզանից խլեցին երազելու՝ այնքան գեղեցիկ զգացողությունները: Ձեր դեպքում ինչպես է. դեռ կարելի է՞ երազել, թե՞...

-Միանշանակ հավատում եմ երազներին։ Քանզի գործնականում, իմ կյանքում յուրաքանչյուր արարք, գործունեություն կապված են երազներիս։ Ինքս եմ տեսել հրեշտակալույս, խաչապատկերը մեր տան գլխավերևում ու, բարեբախտաբար հասցրել եմ նկարել։ Այդ նկարը տպագրվել է «Լոռու մարզ» թերթում և տեղադրել եմ նաև իմ ֆեսբուքյան նկարներում։

Ինչպե՞ս կարող եմ չհավատալ երազների։ Իմ հեղինակային «Լոռու արվեստագետներ» ֆիլմաշարի գաղափարն ինձ նույնպես տրվել է երազով։
Վերջին հաշվով երազների հետ կապված առանձին գիտություն ու գիտական ուսումնասիրություններ կան։
Մենք հաճախ ենք, չէ՞, լսում որ. այս կամ այն մարդն իր երազի կյանքային իրագործման մասին է պատմում։
Իմ կարծիքով, երազներն առհասարակ նախանշման հատկություն ունեն մարդու կյանքում։ Երազը,  դա կարելի է ասել, որ նաև երկնայինի ու երկրայինի կապող համակարգն է, զգացական ու չզգացական երևութականությամբ հանդերձ։ Ոստի պիտի ուշադիր լինենք մեր տեսած, մեզ տրված երազների հանդեպ։ Մենք կարող ենք երազել՝ ԵՐԿՆԱՅԻՆԻՆ խնդրելով...

Իսկ այսօրվա իրողությունները, ինչ խոսք, բումերանգի հատկությունով է հատուցվելու և  ընդհանրապես ցանկացած երևույթ, ցանկացած արարք. բումերանգի հատկություն ունի։

-Հայ Զինվորը, Հայրենիքը Ձեզ համար...

Հայ զինվորը, Հայրենիքը դա ինձ համար ամենասուրբն է, անչափելին։ Հայ զինվորի կերպարը դա մեր պարծանքն է աշխարհի հանդեպ։ Իսկ Հայրենիքը, ինչպես, որ վերևում նշեցի, պիտի լինի առաջին տեղում, ցանկացած մարդու համար։
Հայրենիքը շատ վեհ գաղափար ու իմաստ է, աստվածային՝ կյանքից թանկ։
Հայրենիքը՝ մեր սուրբ Մայրերն են, ուսուցիչներն են, գործի շտապող շինականն ու իր երկրի մասին մտածող, իր շրջապատը զարդարող հայը...
Շնորհակալ եմ հարցազրույցի համար, մաղթում եմ անկորուստ ու վերահառնման տարի։ Սիրենք ու պաշտենք մեր ՀԱՅՐԵՆԻՔԸ։

NewsMedia.am 

Լուրեր Հայաստանից եւ Աշխարհից